ខេត្តបន្ទាយមានជ័យ÷ ដោយអនុវត្តតាមបទបញ្ជាយ៉ាងម៉ឺងម៉ាត់ពី លោកឧត្តមសេនីយ៍ត្រី សឿម សារិទ្ធ ស្នងការនៃស្នងការដ្ឋាននគរបាលខេត្តបន្ទាយមានជ័យ និងក្រោមការដឹកនាំចង្អុលបង្ហាញផ្ទាល់ពី លោកវរសេនីយ៍ទោ ព្រហ្ម ពិសិដ្ឋ អធិការនគរបាលក្រុងប៉ោយប៉ែត កម្លាំងសមត្ថកិច្ចចម្រុះតែងតែបានខិតខំប្រឹងប្រែងបំពេញភារកិច្ចទាំងយប់ទាំងថ្ងៃដូចភ្លៀងរលឹម ដើម្បីការពារសន្តិសុខ សុវត្ថិភាព និងភាពសុខសាន្តជូនប្រជាពលរដ្ឋ។
ជាលទ្ធផលនៃការខិតខំមិនខ្លាចនឿយហត់នេះ កាលពីថ្ងៃអង្គារ ទី០៤ ខែសីហា ឆ្នាំ២០២៦ កម្លាំងជំនាញប្រឆាំងបទល្មើសគ្រឿងញៀន ដឹកនាំដោយ លោកវរសេនីយ៍ទោ កែវ ដូល អធិការរងទទួលផែនប្រឆាំងបទល្មើសគ្រឿងញៀន នៃអធិការដ្ឋាននគរបាលក្រុងប៉ោយប៉ែត សហការជាមួយកម្លាំងនគរបាលយុត្តិធម៌ និងកម្លាំងប៉ុស្តិ៍នគរបាលរដ្ឋបាល បានចុះស្រាវជ្រាវយ៉ាងយកចិត្តទុកដាក់ រហូតឈានដល់ការត្រួតពិនិត្យទីតាំងផ្ទះជួលមួយកន្លែង នៅម្តុំផ្សារកណ្តាល ស្ថិតក្នុងភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
នៅក្នុងប្រតិបត្តិការល្បាត និងបង្ក្រាបបទល្មើសយ៉ាងក្តៅគគុកនេះ កម្លាំងសមត្ថកិច្ចបានធ្វើការឃាត់ខ្លួនជនសង្ស័យជាជនបរទេស (ជាតិចិន) សរុបចំនួន
០៧នាក់ (ស្រី០២នាក់) ព្រមទាំងដកហូតបាននូវអាវុធ និងវត្ថុតាងបទល្មើសជាច្រើនរួមមាន៖ គ្រឿងញៀន និងអាវុធ
ម្សៅក្រាមសថ្លា សង្ស័យជាសារធាតុញៀន ចំនួន ០១កញ្ចប់តូច
ថ្នាំគ្រាប់ពណ៌ក្រហម (មានអក្សរ WY) សង្ស័យជាសារធាតុញៀន ចំនួន ០២គ្រាប់
ថ្នាំកញ្ចប់ពណ៌ខ្មៅ (មានអក្សរចិន) សង្ស័យជាសារធាតុញៀន ចំនួន ០២កញ្ចប់
ឧបករណ៍សម្រាប់ប្រើប្រាស់គ្រឿងញៀនមួយចំនួន
កាំភ្លើងខ្លី ០១ដើម (ពណ៌ស, បង់ ០១, គ្រាប់ ០១ និងសំបកគ្រាប់ ០១)
សម្ភារៈនិងថវិកាពាក់ព័ន្ធ
6. ទូរស័ព្ទដៃ ចំនួន ០៧គ្រឿង
7. លិខិតឆ្លងដែន ចំនួន ០១ក្បាល និងកាតចិន ចំនួន ០៤សន្លឹក
8. ប្រាក់ដុល្លារអាមេរិក ចំនួន ៨០០ដុល្លារ ($800)
9. ប្រាក់រៀលខ្មែរ ចំនួន ១,០០៦,៥០០រៀល
10. រថយន្ត ០១គ្រឿង ម៉ាក Jeep ពណ៌ខ្មៅ (ពាក់ស្លាកលេខ កម្ពុជា 2HTL-6767)
ក្រោយប្រតិបត្តិការឃាត់ខ្លួន កម្លាំងជំនាញបានបញ្ជូនជនសង្ស័យទាំង ០៧នាក់ មកកាន់អធិការដ្ឋាននគរបាលក្រុងប៉ោយប៉ែត ដើម្បីធ្វើការសាកសួរ និងពិនិត្យទឹកនោមស្វែងរកសារធាតុញៀន។ ជាលទ្ធផល បង្ហាញថាជនសង្ស័យទាំង ០៧នាក់ មានសារធាតុមានក្នុងខ្លួនវិជ្ជមាន(+)ទាំងអស់។
ស្នាដៃនៃការចុះបង្ក្រាបករណីខាងលើនេះ បានស្តែងឱ្យឃើញយ៉ាងច្បាស់ពីស្មារតីទទួលខុសត្រូវខ្ពស់ និងការលះបង់យ៉ាងសកម្មរបស់កម្លាំងអធិការដ្ឋាននគរបាលក្រុងប៉ោយប៉ែត ដែលតែងតែចុះល្បាត ស្រាវជ្រាវ និងបង្ក្រាបរាល់បទល្មើសផ្សេងៗ មិនថាករណីគ្រឿងញៀន ចោរលួច ឆក់ ប្លន់ ទ្រព្យសម្បត្តិប្រជាពលរដ្ឋ ឬក្រុមក្មេងទំនើងបង្កអសន្តិសុខក្នុងសង្គមឡើយ ដើម្បីធានាបាននូវគោលនយោបាយ «ភូមិ-ឃុំ-សង្កាត់ មានសុវត្ថិភាព»។
បច្ចុប្បន្ន ជនសង្ស័យប្រុសស្រីទាំង ០៧នាក់ ព្រមទាំងវត្ថុតាងទាំងអស់ ត្រូវបានកម្លាំងជំនាញកសាងសំណុំរឿង បញ្ជូនទៅកាន់ស្នងការដ្ឋាននគរបាលខេត្តបន្ទាយមានជ័យ ដើម្បីចាត់ការបន្តតាមនីតិវិធីច្បាប់៕សម្រួលអត្ថបទ÷ដោយ លោកមុខចិត្រា ហៅ ប្រម៉ាញ់ជាយដែន
