ខេត្តប៉ៃលិន÷ នាថ្ងៃទី២៥ ខែកក្កដា ឆ្នាំ២០២៦ លោកជំទាវបណ្ឌិត បាន ស្រីមុំ អភិបាល នៃគណៈអភិបាលខេត្តប៉ៃលិន អមដំណើរដោយមន្ត្រីជំនាញ និងអាជ្ញាធរពាក់ព័ន្ធ បានអញ្ជើញចុះពិនិត្យមើលវឌ្ឍនភាពការងារកែប្រែ និងស្ថាបនាបន្ថែមនូវហេដ្ឋារចនាសម្ព័ន្ធនានា នៅតំបន់ជ្រោះសែនសុខ ដើម្បីបង្កើនសោភ័ណភាព បំពេញតម្រូវការផ្នែកបរិស្ថាន និងទាក់ទាញភ្ញៀវទេសចរជាតិ-អន្តរជាតិឱ្យមកកម្សាន្តកាន់តែច្រើនឡើង។
ក្នុងឱកាសអញ្ជើញពិនិត្យទីតាំងផ្ទាល់ លោកជំទាវបណ្ឌិត បាន ស្រីមុំ បានគូសបញ្ជាក់ថា រាជរដ្ឋាភិបាលកម្ពុជាក្រោមការដឹកនាំដ៏ឆ្លាតវៃ របស់ សម្ដេចមហាបវរធិបតី ហ៊ុន ម៉ាណែតនាយករដ្ឋមន្ត្រី តែងតែយកចិត្តទុកដាក់ខ្ពស់លើសុខទុក្ខរបស់ប្រជាពលរដ្ឋ ដោយបានជួយដោះស្រាយរាល់ការលំបាក និងជំរុញការអភិវឌ្ឍប្រទេសជាតិលើគ្រប់វិស័យ។ ជាពិសេស ការកសាងហេដ្ឋារចនាសម្ព័ន្ធរូបវន្តដូចជា ផ្លូវ ស្ពាន សាលារៀន និងមន្ទីរពេទ្យជាដើម។
បន្ថែមពីលើនេះ ស្របតាមទស្សនវិស័យអភិវឌ្ឍន៍បៃតង និងចីរភាព រដ្ឋបាលខេត្តប៉ៃលិន បាននិងកំពុងខិតខំប្រឹងប្រែងយ៉ាងសកម្មក្នុងការ៖ លម្អទីក្រុង និងធម្មជាតិ ដាំដើមឈើ បន្ថែមសួនផ្កា និងកែប្រែសួនច្បារតាមទ្រូងផ្លូវដើម្បីបង្កើត «ក្រវាត់ពណ៌បៃតង» ក្នុងក្រុង ដែលជួយសម្រួលដល់បរិស្ថាន សុខភាព និងបង្កើនសោភ័ណភាពទីក្រុង។
ទាក់ទាញវិនិយោគ និងទេសចរណ៍÷ ការរៀបចំហេដ្ឋារចនាសម្ព័ន្ធស្អាតបាត និងមានរបៀបរៀបរយ ជាកាតាលីករដ៏សំខាន់ក្នុងការជំរុញកំណើនសេដ្ឋកិច្ច បង្កើតការងារ និងលើកកម្ពស់ជីវភាពរស់នៅរបស់ប្រជាពលរដ្ឋក្នុងមូលដ្ឋាន។
ជាមួយគ្នានេះដែរ លោកជំទាវបណ្ឌិតអភិបាលខេត្ត ក៏បានអំពាវនាវយ៉ាងទទូចដល់ប្រជាពលរដ្ឋ ម្ចាស់ទីតាំងអាជីវកម្ម ជាពិសេសអាជីវករលក់ដូរតាមទីសាធារណៈ និងសួនច្បារ ត្រូវចូលរួមសហការរៀបចំសម្អាតអនាម័យនៅមុខបរិវេណរបស់ខ្លួនជាប្រចាំ ដោយត្រូវវេចខ្ចប់ និងទុកដាក់សំរាមឱ្យបានត្រឹមត្រូវតាមបច្ចេកទេស និងចៀសវាងដាច់ខាតនូវការបោះចោលសំរាមពាសវាលពាសកាលដែលនាំឱ្យប៉ះពាល់ដល់សោភ័ណភាពសាធារណៈ។
សូមបញ្ជាក់ផងដែរថា៖ គម្រោងអភិវឌ្ឍន៍បន្ថែមនៅតំបន់ ជ្រោះ សែន សុខ (ស្ថិតក្នុងភូមិបឹងព្រលឹត ឃុំស្ទឹងកាច់ ស្រុកសាលាក្រៅ) នាពេលនេះ រួមមាន ការស្ថាបនាអគារបណ្ណាល័យ និងការកសាងរូបបដិមាព្រះពុទ្ធផ្ទាញ់មាដ៏ធំ
ដើម្បីលើកកម្ពស់សោភ័ណភាពតំបន់ និងចូលរួមទ្រទ្រង់វិស័យព្រះពុទ្ធសាសនា ដែលជាសាសនារបស់រដ្ឋឱ្យកាន់តែរីកចម្រើនតទៅមុខ៕ រាយការណ៍÷ដោយលោក ស សារឿន
