ខេត្តបន្ទាយមានជ័យ÷ ក្រោមការដឹកនាំ និងបញ្ជាផ្ទាល់យ៉ាងម៉ឺងម៉ាត់ពីសំណាក់ ឯកឧត្ដម នាយឧត្ដមសេនីយ៍ ស ថេត អគ្គស្នងការនគរបាលជាតិ និង លោកឧត្ដមសេនីយ៍ត្រី សឿម សារិទ្ធ ស្នងការ នៃស្នងការដ្ឋាននគរបាលខេត្តបន្ទាយមានជ័យ ព្រមទាំងមានការសម្របសម្រួលនីតិវិធីពី ឯកឧត្តម កើត វណ្ណារ៉េត ព្រះរាជអាជ្ញា នៃអយ្យការអមសាលាដំបូងខេត្ត កម្លាំងជំនាញប្រឆាំងគ្រឿងញៀន បានបើកប្រតិបត្តិការវាយឆ្មក់យ៉ាងក្តៅគគុកមួយ រហូតឈានដល់ការបង្ក្រាប និងឃាត់ខ្លួនជនសង្ស័យជាជនបរទេសប្រុស-ស្រី ចំនួន ៤នាក់ ពាក់ព័ន្ធករណីជួញដូរ និងប្រើប្រាស់ដោយខុសច្បាប់នូវសារធាតុញៀន។
ប្រតិបត្តិការដ៏ជោគជ័យនេះ បានធ្វើឡើងកាលពីវេលាម៉ោង ១៨ និង ៣០នាទី ថ្ងៃទី ០៨ ខែកក្កដា ឆ្នាំ២០២៦ ម្សិលមិញនេះ ដោយមានការដឹកនាំផ្ទាល់ពី លោកឧត្ដមសេនីយ៍ត្រី ធិន ស៊ិនដេត ស្នងការរងផែនការងារប្រឆាំងគ្រឿងញៀន បាននាំកម្លាំងការិយាល័យជំនាញ ចុះឡោមព័ទ្ធ និងបង្ក្រាបនៅចំណុចផ្លូវលំ ស្ថិតក្នុងភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។
តាមការបញ្ជាក់ពី លោកឧត្ដមសេនីយ៍ត្រី ធិន ស៊ិន ដេត ជនសង្ស័យទាំង ៤នាក់ ដែលត្រូវឃាត់ខ្លួន រួមមាន៖
១. ឈ្មោះ ហិន ឌ្រី វីចាយ៉ា អាសិន (Hendry Wijaya Asen) ភេទប្រុស អាយុ ៣៥ឆ្នាំ ជនជាតិឥណ្ឌូនេស៊ី។ វត្ថុតាងដកហូតរួមមាន៖ ថ្នាំញៀនប្រភេទម៉ាទឹកកក ចំនួន ០២កូនថង់, ក្បាលPod K ចំនួន ៣០កញ្ចប់ និងទូរស័ព្ទដៃ ០១គ្រឿង។
២. ឈ្មោះ ហាន ដុងសិន (Han DongSheng) ភេទប្រុស អាយុ ៤០ឆ្នាំ ជនជាតិចិន។ វត្ថុតាងដកហូតរួមមាន៖ ក្បាលPod K ចំនួន ២៣កញ្ចប់, ទូរស័ព្ទដៃ ០១គ្រឿង និងរថយន្ត ០១គ្រឿង។
៣. ឈ្មោះ ម៉ាន់ យីគុយ (Man Yigui) ភេទប្រុស អាយុ ២៦ឆ្នាំ ជនជាតិចិន។
៤. ឈ្មោះ អា ភីនយ៉ា ភូទីបា (Apinya Potiba) ភេទស្រី អាយុ ២១ឆ្នាំ ជនជាតិថៃ (ស្នាក់នៅក្នុងផ្ទះជាមួយគ្នា)។
ក្រោយពីបានឃាត់ខ្លួន សមត្ថកិច្ចបានបន្តរុករក និងត្រួតពិនិត្យនៅក្នុងបន្ទប់ទី២ បន្ថែមទៀត ដោយបានរកឃើញវត្ថុតាងបំរើឱ្យការសេព និងចែកចាយ រួមមាន៖ ជញ្ជីងថ្លឹងថ្នាំញៀន ចំនួន ១, ម៉ាស៊ីនបារីអេឡិចត្រូនិច្ច ចំនួន ០៧គ្រឿង ព្រមទាំងសម្បកថង់សម្រាប់ច្រកមួយចំនួនធំ។
ភ្លាមៗនោះ សមត្ថកិច្ចបាននាំខ្លួនជនសង្ស័យរួមនឹងវត្ថុតាងទាំងអស់ មកកាន់ការិយាល័យប្រឆាំងគ្រឿងញៀន ដើម្បីអនុវត្តតាមនីតិវិធី។ ជាលទ្ធផលនៃការធ្វើតេស្តស្វែងរកសារធាតុញៀន បង្ហាញថា ជនសង្ស័យភេទប្រុសទាំង ៣នាក់ មានលទ្ធផល វិជ្ជមាន (+) ចំណែកឯស្ត្រីជនជាតិថៃឈ្មោះ អា ភីនយ៉ា ភូទីបា មានលទ្ធផល អវិជ្ជមាន (-)។
ប្រតិបត្តិការដ៏ឆ្នើមនេះ សបញ្ជាក់ឱ្យឃើញពីការប្តេជ្ញាចិត្តខ្ពស់ និងភាពវៃឆ្លាតរបស់កងកម្លាំងនគរបាលខេត្តបន្ទាយមានជ័យ ក្នុងការលុបបំបាត់បទល្មើសគ្រឿងញៀន ដែលជាសត្រូវលាក់មុខបំផ្លាញសង្គម។ ការបង្ក្រាបឆ្លងដែនដែលមានការចូលរួមពីជនបរទេសច្រើនជាតិសាសន៍បែបនេះ មិនត្រឹមតែបង្ហាញពីសមត្ថភាពទប់ស្កាត់ បទល្មើសទាន់ពេលវេលាប៉ុណ្ណោះទេ ប៉ុន្តែថែមទាំងបានរួមចំណែកយ៉ាងធំធេងក្នុងការរក្សាសន្តិសុខ សណ្តាប់ធ្នាប់សង្គម និងសុវត្ថិភាពជូនប្រជាពលរដ្ឋនៅក្នុងភូមិសាស្ត្រក្រុងប៉ោយប៉ែត ស្របតាមគោលនយោបាយភូមិ-ឃុំមានសុវត្ថិភាព។
បច្ចុប្បន្ន ជនសង្ស័យទាំង ៤នាក់ រួមជាមួយវត្ថុតាងត្រូវបានកម្លាំងជំនាញកសាងសំណុំរឿង បញ្ជូនទៅកាន់សាលាដំបូងខេត្តបន្ទាយមានជ័យ ដើម្បីចាត់ការបន្តតាមនីតិវិធីច្បាប់៕ សម្រួលអត្ថបទ÷ដោយ លោកមុត ចិត្រា ហៅ ប្រម៉ាញ់ជាយដែន
