ខេត្តតាកែវ÷កម្លាំងសមត្ថកិច្ចជំនាញនៃអធិការដ្ឋាននគរបាលស្រុកគិរីវង់ បានបើកប្រតិបត្តិការចុះបង្ក្រាបករណីជួញដូរ និងប្រើប្រាស់សារធាតុញៀនខុសច្បាប់យ៉ាងក្តៅគគុកមួយកន្លែង ដោយបានធ្វើការឃាត់ខ្លួនជនសង្ស័យជាបុរសចំនួន ១០នាក់ ព្រមទាំងដកហូតបានវត្ថុតាងគ្រឿងញៀន និងមធ្យោបាយធ្វើសកម្មភាពមួយចំនួន។
កិច្ចប្រតិបត្តិការខាងលើនេះ ត្រូវបានធ្វើឡើងកាលពីថ្ងៃចន្ទ ១៥កើត ខែបឋមាសាឍ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី២៩ ខែមិថុនា ឆ្នាំ២០២៦ ក្រោមការចង្អុលបង្ហាញផ្ទាល់ពី លោកឧត្តមសេនីយ៍ទោ ម៉ែន លី ស្នងការនៃស្នងការដ្ឋាននគរបាលខេត្តតាកែវ និងមានការសម្របសម្រួលនីតិវិធីពី ឯកឧត្តម ឯក ឆេងហួតព្រះរាជអាជ្ញា នៃអយ្យការអមសាលាដំបូងខេត្តតាកែវ។
នៅក្នុងការចុះអនុវត្តផ្ទាល់ វរសេនីយ៍ឯក ជាសុផល អធិការនៃអធិការដ្ឋាននគរបាលស្រុកគិរីវង់ បានដឹកនាំលោកអធិការរងទទួលផែនប្រយុទ្ធប្រឆាំងគ្រឿងញៀន រួមជាមួយកម្លាំងជំនាញ និងកម្លាំងអន្តរាគមន៍ស្រុក ចុះទៅដល់ទីតាំងស្តែងៗ និងឃាត់ខ្លួនក្រុមជនសង្ស័យទាំង ១០នាក់នោះតែម្តង។
ជាលទ្ធផលនៃការបង្ក្រាប សមត្ថកិច្ចបានដកហូតវត្ថុតាងរួមមាន៖
ម្សៅក្រាមពណ៌សថ្លា (សង្ស័យជាសារធាតុញៀន) ចំនួន ០៧ កញ្ចប់តូច
ម៉ូតូចំនួន ០៤ គ្រឿង
ទូរស័ព្ទដៃចំនួន ០៧ គ្រឿង
បច្ចុប្បន្ន ទាំងក្រុមជនសង្ស័យ និងវត្ថុតាងចាប់យកទាំងអស់ ត្រូវបានកម្លាំងនគរបាលស្រុកគិរីវង់ កសាងសំណុំរឿង និងបញ្ជូនទៅកាន់ការិយាល័យជំនាញ នៃស្នងការដ្ឋាននគរបាលខេត្តតាកែវ ដើម្បីអនុវត្តតាមនីតិវិធីច្បាប់ជាធរមាន៕ សម្រួលអត្ថបទដោយលោកមុត ចិត្រា ហៅ ប្រម៉ាញ់ជាយដែន
