ខេត្តតាកែវ÷ ស្តែងចេញពីមនោសញ្ចេតនាជិតស្និទ្ធ និងការយកចិត្តទុកដាក់ខ្ពស់ចំពោះសុខទុក្ខរបស់មន្ត្រីរាជការ ក៏ដូចជាសមាជិកាសមាគម នាcontextរសៀលថ្ងៃអង្គារ ទី៣០ ខែមិថុនា ឆ្នាំ២០២៦ ម្សិលមិញនេះ លោកស្រី ឡុង បូណារេត អភិបាលរងខេត្តតាកែវ និងជាប្រធានគណៈកម្មការសាខាសមាគមនារីកម្ពុជា ដើម្បីសន្តិភាព និងការអភិវឌ្ឍខេត្ត បានដឹកនាំក្រុមការងារអញ្ជើញចុះសួរសុខទុក្ខ និងនាំយកអំណោយមនុស្សធម៌ទៅឧបត្ថម្ភជូន លោកស្រី លឹម គិត ដែលជាមន្ត្រីរតនាគារខេត្តតាកែវ និងជាសមាជិកាសមាគមនារីខេត្ត។
សកម្មភាពមនុស្សធម៌ដ៏មានអត្ថន័យនេះ ត្រូវបានធ្វើឡើងក្រោមការតំណាងដ៏ខ្ពង់ខ្ពស់របស់ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ។ គណៈប្រតិភូបានធ្វើដំណើរទៅសួរសុខទុក្ខផ្ទាល់ដល់គេហដ្ឋានរបស់ លោកស្រី លឹម គិត ដែលស្ថិតនៅភូមិ២ សង្កាត់រកាក្នុង ក្រុងដូនកែវ ខេត្តតាកែវ ក្នុងឱកាសដែលរូបលោកស្រីទើបតែបានចេញពីសម្រាកព្យាបាលនៅមន្ទីរពេទ្យ និងកំពុងបន្តសម្រាកថែទាំសុខភាពនៅផ្ទះ។
ក្នុងឱកាសជួបសម្តែងការគិតគូរនោះ លោកស្រី ឡុង បូណារេត បានពាំនាំនូវការផ្តាំផ្ញើសួរសុខទុក្ខ ប្រកបដោយក្តីនឹករលឹក និងការអាណិតស្រឡាញ់ដ៏ជ្រាលជ្រៅពីសំណាក់ ឯកឧត្តម វ៉ី សំណាង អភិបាលខេត្តតាកែវ ជូនចំពោះលោកស្រី លឹម គិត និងក្រុមគ្រួសារ ព្រមទាំងបានស្វែងយល់ពីស្ថានភាពជំងឺ និងការរស់នៅប្រចាំថ្ងៃផងដែរ។ លោកស្រីប្រធានសមាគម ក៏បានអំពាវនាវ និងជូនពរឱ្យលោកស្រី លឹម គិត ឆាប់បានជាសះស្បើយពីជំងឺ ដើម្បីមានកម្លាំងមាំមួនឡើងវិញ អាចត្រឡប់មកបំពេញភារកិច្ចបម្រើជាតិ និងសង្គមរៀងរាល់ថ្ងៃដូចដើម។
ដើម្បីជួយសម្រាលបន្ទុកគ្រួសារ និងជាការលើកទឹកចិត្ត ក្នុងដំណើរចុះសួរសុខទុក្ខនេះ លោកស្រីអភិបាលរងខេត្ត និងក្រុមការងារ បាននាំយកនូវអំណោយមនុស្សធម៌ដ៏ថ្លៃថ្លារបស់ ឯកឧត្តមអភិបាលខេត្ត រួមជាមួយថវិកាឧបត្ថម្ភមួយចំនួនរបស់សាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្តតាកែវ ប្រគល់ជូនផ្ទាល់ដៃដល់អ្នកជំងឺ។
សកម្មភាពចុះសួរសុខទុក្ខដល់លំនៅឋាននេះ បានឆ្លុះបញ្ចាំងឱ្យឃើញយ៉ាងច្បាស់ពីស្មារតីសាមគ្គីភាព ឯកភាពផ្ទៃក្នុង និងការយកចិត្តទុកដាក់ដ៏កក់ក្តៅរបស់ថ្នាក់ដឹកនាំខេត្តតាកែវ មិនថាក្នុងកាលៈទេសៈណាក៏ដោយ គឺតែងតែនៅក្បែរ និងរួមសុខរួមទុក្ខជាមួយមន្ត្រីរាជការ ក្រោមឱវាទជានិច្ច ជាពិសេសសមាជិកានៃសមាគមនារី ដែលបានខិតខំលះបង់កម្លាំងកាយចិត្តជួយការងារសង្គមនាលកន្លងមក៕ រាយការណ៍ដោយ លោក សឿន ហៀរឡុង
