ភ្នំពេញ៖ សកម្មភាពចាក់ដីរំលោភយកឆ្នេរខ្សាច់ និងច្រាំងទន្លេដែលជាសម្បត្តិសាធារណៈរបស់រដ្ឋ កំពុងតែបន្តកើតមានយ៉ាងគគ្រឹកគគ្រេង និងព្រហើនបំផុត ស្ថិតក្នុងភូមិសាស្ត្រ ភូមិចំបក់មាស សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ។ ជាក់ស្តែង នៅថ្ងៃព្រហស្បតិ៍ ទី២៥ ខែមិថុនា ឆ្នាំ២០២៦ នេះ ក្រុមអ្នកសារព័ត៌មានយើងជាច្រើនអង្គភាព បានចុះទៅពិនិត្យផ្ទាល់ដល់ទីតាំង និងបានផ្ដិតយករូបភាព ដែលបង្ហាញយ៉ាងច្បាស់ថា សកម្មភាពចាក់ដីយ៉ាងអាណាធិបតេយ្យនេះ កំពុងតែលៀនជ្រែកចូលទៅក្នុងផ្ទៃទឹក និងដីចំណីទន្លេយ៉ាងជ្រៅ គួរឱ្យអាសូរដល់ទន្លេមេគង្គ។
ទីតាំងដែលកំពុងរងការរំលោភបំពាននេះ ស្ថិតនៅក្នុងភូមិសាស្ត្រ សង្កាត់បាក់ខែង ខណ្ឌជ្រោយចង្វារ។ បច្ចុប្បន្ន គេសង្កេតឃើញមានគ្រឿងចក្រធុនធ្ងន់ និងកម្មករជាច្រើននាក់ កំពុងតែបំពេញការងារយ៉ាងសកម្ម ដោយមិនញញើតនឹងច្បាប់ទម្លាប់បន្តិចណាឡើយ។
ផ្អែកតាមប្រភពពីប្រជាពលរដ្ឋនៅក្នុងមូលដ្ឋាន និងអ្នករាយការណ៍ព័ត៌មាន បាននិងកំពុងដាក់មន្ទិលសង្ស័យយ៉ាងខ្លាំងថា៖
“បើមិនមានការឃុបឃិត បើកភ្លើងខៀវឬកាងពីក្រោយសំណាក់អាជ្ញាធរពាក់ព័ន្ធនៅក្នុងមូលដ្ឋាននោះទេ តើបុគ្គលឯកជនអាចមានសិទ្ធិអំណាចអ្វីមកកាយដីលុបទន្លេដែលជាសទ្រព្តម្បត្តិរួមរបស់ជាតិបានតាមអំពើចិត្តបែបនេះ?” ឬមួយឱ្យតែមានលុយ មានអំណាច គឺអាចធ្វើអ្វីៗបានទាំងអស់ ដោយមិនបាច់ខ្វល់ពីច្បាប់? ការយកគ្រឿងចក្រមកដឹកជញ្ជូនដីលុបច្រាំងទន្លេនេះ មិនត្រឹមតែជាការបំពានច្បាប់ដីធ្លីប៉ុណ្ណោះទេ ប៉ុន្តែវាកំពុងតែបំផ្លាញបរិស្ថាន ប្រព័ន្ធអេកូឡូស៊ី និងដីច្រាំងទន្លេដែលជាសម្បត្តិរដ្ឋយ៉ាងធ្ងន់ធ្ងរ។
សកម្មភាពបំផ្លាញទ្រព្យសម្បត្តិរដ្ឋនេះ បានចោទជាសំណួរយ៉ាងធំផ្ញើទៅកាន់ លោក លឹម សុភា អភិបាលខណ្ឌជ្រោយចង្វារ ថា តើលោកពិតជាបានដឹងឮដែរឬទេ? ឬមួយក៏ធ្វើជា «ភ្នែកងងឹត ឬក៏ត្រូវថ្នាំសណ្ដំទឹកប្រាក់ » មិនដឹងមិនឮ អប្យាក្រឹតភាពចំពោះទង្វើខុសច្បាប់ទាំងនេះ?
ទាក់ទិននឹងករណីបំផ្លិចបំផ្លាញធនធានធម្មជាតិ និងសម្បត្តិសាធារណៈនេះ បើតាមទិដ្ឋភាពច្បាប់នៃព្រះរាជាណាចក្រកម្ពុជា៖
ច្បាប់ភូមិបាលឆ្នាំ២០០១(មាត្រា១៥និងមាត្រា២៥៩) បានចែងយ៉ាងច្បាស់ថា ឆ្នេរខ្សាច់ ច្រាំងទន្លេ និងផ្លូវទឹកធម្មជាតិ គឺជាសម្បត្តិសាធារណៈរបស់រដ្ឋ ដែលមិនអាចមានបុគ្គលណាម្នាក់យកធ្វើជាកម្មសិទ្ធិឯកជន ឬធ្វើការកែប្រែបំផ្លិចបំផ្លាញបានឡើយ។ ការរំលោភបំពានដីសាធារណៈរបស់រដ្ឋ ត្រូវផ្តន្ទាទោសពិន័យជាប្រាក់ និងទោសដាក់ពន្ធនាគារ ព្រមទាំងបង្គាប់ឱ្យរំលាយសំណង់ ឬស្តារស្ថានភាពដីឡើងវិញ។
ច្បាប់ស្ដីពីការការពារបរិស្ថាននិងការគ្រប់គ្រងធនធានធម្មជាតិ(មាត្រា២០)ការរាល់សកម្មភាពទាំងឡាយណាដែលបង្កឱ្យមានការបំផ្លិចបំផ្លាញ ឬប៉ះពាល់ដល់ប្រព័ន្ធអេកូឡូស៊ីប្រភពទឹក ត្រូវទទួលទោសតាមច្បាប់ជាធរមាន។
ក្រុមព្រហ្មទណ្ឌនៃព្រះរាជាណាចក្រកម្ពុជា(មាត្រា៦០៨) ទាក់ទិននឹងការបំផ្លិចបំផ្លាញដោយចេតនានូវទ្រព្យសម្បត្តិសាធារណៈ ដែលត្រូវប្រឈមមុខនឹងការចោទប្រកាន់តាមផ្លូវតុលាការ។
ព្រោះតែមើលឃើញពីវិនាសកម្មនៃច្រាំងទន្លេនេះ ប្រជាពលរដ្ឋ និងមហាជនទូទៅ សូមគោរពសំណូមពរយ៉ាងទទូចដល់៖
១.ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថាន
២.ឯកឧត្តម ថោ ជេដ្ថា រដ្ឋមន្ត្រីក្រសួងធនធានទឹក និងឧតុនិយម
មេត្តាជួយចាត់មន្ត្រីជំនាញចុះពិនិត្យមើលផលប៉ះពាល់បរិស្ថាន ប្រព័ន្ធអេកូឡូស៊ី និងរំហូរទឹកទន្លេនៅតំបន់នោះជាបន្ទាន់។
ទន្ទឹមនឹងនេះ សូមគោរពស្នើសុំដល់ ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ មេត្តាចាត់វិធានការក្តៅ ចុះទប់ស្កាត់ឱ្យទាន់ពេលវេលា ដើម្បីកុំឱ្យដីរដ្ឋត្រូវធ្លាក់ក្នុងដៃបុគ្គលខិលខូច។
ជាពិសេស សូមរំលឹក និងសំណូមពរចំៗដល់ លោក លឹម សុភា អភិបាលខណ្ឌជ្រោយចង្វារ មេត្តាបង្ហាញពីភាពស្អាតស្អំ និងការទទួលខុសត្រូវរបស់ខ្លួន ដោយចាត់មន្ត្រីជំនាញចុះផ្អាកសកម្មភាពនេះជាបន្ទាន់ ដើម្បីកុំឱ្យមានការរិះគន់ និងមន្ទិលសង្ស័យពីមហាជនតាមពាក្យស្លោកថា “ខ្មោចស្រុកមិនឱ្យដៃ ខ្មោចព្រៃក៏មិនហ៊ាន” ពោលគឺ បើអាជ្ញាធរមូលដ្ឋានមិនបើកដៃ គឺគ្មានជនណាហានធ្វើឡើយ។ មហាជនកំពុងរង់ចាំមើលថា តើការចាក់ដីចូលចំណីទន្លេនេះ មានច្បាប់អនុញ្ញាតត្រឹមត្រូវពីក្រសួងសាមីដែរឬទេ? ឬគ្រាន់តែជាការលួចធ្វើដោយអាណាធិបតេយ្យ?
ប្រជាពលរដ្ឋ និងអ្នកសារព័ត៌មានយើង នឹងបន្តតាមដានករណីនេះដោយយកចិត្តទុកដាក់ និងរង់ចាំមើលចំណាត់ការតាមផ្លូវច្បាប់ពីសំណាក់អាជ្ញាធរមានសមត្ថកិច្ចដោយក្តីសង្ឃឹម។
អង្គភាពសារព័ត៌មានយើងខ្ញុំ ផ្សព្វផ្សាយព័ត៌មាននេះ ក្នុងគោលបំណងរិះគន់ក្នុងន័យស្ថាបនា និងឆ្លុះបញ្ចាំងតថភាពសង្គម ជូនថ្នាក់ដឹកនាំបានជ្រាបជាព័ត៌មាន ដើម្បីការពារផលប្រយោជន៍រួមរបស់ជាតិ។ យើងខ្ញុំរង់ចាំការឆ្លើយបំភ្លឺពីគ្រប់ស្ថាប័នពាក់ព័ន្ធ និងម្ចាស់ទីតាំងរៀងរាល់ម៉ោងធ្វើការ ដើម្បីធានានូវតម្លាភាព និងវិជ្ជាជីវៈអ្នកសារព័ត៌មាន។ សូមអរគុណ!
