ខេត្តបន្ទាយមានជ័យ÷ ក្រោមការអនុវត្តតាមបទបញ្ជា និងការចង្អុលបង្ហាញដ៏ខ្ពង់ខ្ពស់ពីសំណាក់ លោកឧត្តមសេនីយ៍ត្រី សឿមសារិទ្ធ ស្នងការនៃស្នងការដ្ឋាននគរបាលខេត្តបន្ទាយមានជ័យ រួមនឹងការយកចិត្តទុកដាក់ដឹកនាំយ៉ាងម៉ឺងម៉ាត់ពី លោកវរសេនីយ៍ទោ ព្រហ្ម ពិសិដ្ឋ អធិការនគរបាលក្រុងប៉ោយប៉ែត កម្លាំងជំនាញប្រឆាំងបទល្មើសគ្រឿងញៀន បានបើកយុទ្ធនាការស្រាវជ្រាវ និងចុះបង្ក្រាបយ៉ាងក្តៅគគុកដូចភ្លៀងរលឹម ដោយឃាត់ខ្លួនជនសង្ស័យប្រុស-ស្រីបានជាបន្តបន្ទាប់។
ប្រតិបត្តិការដ៏ជោគជ័យនេះ ដឹកនាំបញ្ជាផ្ទាល់ដោយ លោកវរសេនីយ៍ទោ កែវ ដុល អធិការរងទទួលផែនការងារប្រឆាំងបទល្មើសគ្រឿងញៀន នៃអធិការដ្ឋាននគរបាលក្រុងប៉ោយប៉ែត ដោយបានចុះទៅបង្ក្រាបចំគោលដៅនៅចំណុចស្តារវីហ្កាស និងបានឃាត់ខ្លួនមនុស្សប្រុស-ស្រីសរុបចំនួន ១៤១នាក់ យកមកធ្វើតេស្តរកសារធាតុញៀន ដើម្បីចាត់វិធានការតាមច្បាប់។
យោងតាមការបញ្ជាក់ពី លោកវរសេនីយ៍ទោកែវ ដុល បានឱ្យដឹងថា នៅក្នុងកិច្ចប្រតិបត្តិការនេះ ដោយមានការសម្របសម្រួលនីតិវិធីពីសំណាក់ លោក សំរិទ្ធ សុខុន ព្រះរាជអាជ្ញារង អមសាលាដំបូងខេត្តបន្ទាយមានជ័យ លទ្ធផលនៃការវាយតម្លៃ និងធ្វើតេស្តរកសារធាតុញៀនត្រូវបានបែងចែកជាពីរករណីរួមមាន៖
ករណីទី១. មនុស្សប្រុស-ស្រីចំនួន ៥៩នាក់ (ក្នុងនោះស្រី ២៤នាក់) ត្រូវបានសមត្ថកិច្ចធ្វើការអប់រំណែនាំ និងអនុញ្ញាតឱ្យត្រឡប់ទៅលំនៅដ្ឋានវិញជាធម្មតា។
ករណីទី២. ជនល្មើសប្រុស-ស្រីចំនួន ៨២នាក់ ត្រូវបានកម្លាំងជំនាញកសាងសំណុំរឿងជាផ្លូវការ ដើម្បីបញ្ជូនបន្តទៅកាន់ស្នងការដ្ឋាននគរបាលខេត្តបន្ទាយមានជ័យ អនុវត្តតាមនីតិវិធីច្បាប់។
សកម្មភាពបង្ក្រាបយ៉ាងទាន់ពេលវេលា និងប្រកបដោយប្រសិទ្ធភាពខ្ពស់នេះ បានស្តែងឱ្យឃើញពីការប្តេជ្ញាចិត្តយ៉ាងមុតមាំរបស់ថ្នាក់ដឹកនាំ និងមន្ត្រីនគរបាលក្រុងប៉ោយប៉ែត ក្នុងការលុបបំបាត់បទល្មើសគ្រឿងញៀន ដើម្បីរក្សាសន្តិសុខ សុវត្ថិភាព និងភាពសុខសាន្តជូនប្រជាពលរដ្ឋនៅក្នុងមូលដ្ឋាន ដែលទង្វើដ៏សកម្មនេះទទួលបានការកោតសរសើរយ៉ាងខ្លាំងពីសំណាក់មហាជនទូទៅ។ សម្រួល អត្ថបទ ដោយលោក មុត ចិត្រា ហៅ ប្រម៉ាញ់ជាយដែន
