ខេត្តបន្ទាយមានជ័យ÷កម្លាំងនគរបាលការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តបន្ទាយមានជ័យ បានបញ្ជូនខ្លួនជនសង្ស័យប្រុស-ស្រីចំនួន ៨នាក់ ពាក់ព័ន្ធនឹងករណីជួញដូរ និងប្រើប្រាស់ដោយខុសច្បាប់នូវសារធាតុញៀន រួមជាមួយវត្ថុតាងជាច្រើនទៅកាន់សាលាដំបូងខេត្តបន្ទាយមានជ័យ នៅថ្ងៃទី១៧ ខែមិថុនា ឆ្នាំ២០២៦ នេះ ដើម្បីចាត់ការបន្តតាមនីតិវិធីច្បាប់ បន្ទាប់ពីបើកប្រតិបត្តិការបង្ក្រាបជាបន្តបន្ទាប់យ៉ាងក្តៅគគុក។
យោងតាមការបញ្ជាក់ពី លោកវរសេនីយ៍ទោ អុន កាថន អធិការនគរបាលស្រុកស្វាយចេក បានឱ្យដឹងថា ប្រតិបត្តិការដ៏មានប្រសិទ្ធភាពនេះ គឺត្រូវបានធ្វើឡើងក្រោមបទបញ្ជាយ៉ាងម៉ឺងម៉ាត់ពី លោកឧត្តមសេនីយ៍ត្រី សឿម សារិទ្ធ ស្នងការនគរបាលខេត្តបន្ទាយមានជ័យ និងមានការចង្អុលបង្ហាញផ្ទាល់ពី លោកឧត្តមសេនីយ៍ត្រី ធិន ស៊ិនដេត ស្នងការរងទទួលផែនការងារប្រឆាំងបទល្មើសគ្រឿងញៀន។
ជាលទ្ធផលនៃកិច្ចប្រឹងប្រែងរបស់កម្លាំងជំនាញ ជនសង្ស័យទាំង ៨នាក់ ត្រូវបានឃាត់ខ្លួនជាបន្តបន្ទាប់ដូចខាងក្រោម៖ គោលដៅទី១.ការឃាត់ខ្លួនដំបូង ថ្ងៃទី១៥ ខែមិថុនា ឆ្នាំ ២០២៦ វេលាម៉ោង ៤:៤០ នាទីល្ងាច កម្លាំងជំនាញស្រុក ដឹកនាំដោយ លោកវរសេនីយ៍ត្រី ដា រតនៈ អធិការរងទទួលផែនប្រឆាំងគ្រឿងញៀន សហការជាមួយកម្លាំងប៉ុស្តិ៍នគរបាលរដ្ឋបាលឃុំតាផូ បានធ្វើការល្បាត និងឃាត់ខ្លួនជនសង្ស័យម្នាក់នៅចំណុចអាងប្រាសាទប្រាំ (ខាងជើងភូមិគោកកី ឃុំតាផូ)៖
ឈ្មោះ ថាត់ លីន ភេទប្រុស អាយុ ២៨ឆ្នាំ (រស់នៅភូមិយាងវៀន ឃុំផ្គាំ)។ ឆែកឆេររកឃើញម្សៅក្រាមពណ៌សថ្លា ២កូនថង់ (សង្ស័យជាសារធាតុញៀន) និងមានលទ្ធផលតេស្តទឹកនោម វិជ្ជមាន (+).។
គោលដៅទី២÷បើកការស្រាវជ្រាវពង្រីកមុខសញ្ញាថ្ងៃទី១៦.ខែមិថុនា ឆ្នាំ២០២៦
ផ្អែកលើចម្លើយសារភាពរបស់ជនសង្ស័យខាងលើ នៅវេលាម៉ោង ១០:០០ នាទីព្រឹក លោកអធិការស្រុក បានចាត់តាំង លោកវរសេនីយ៍ទោ គក់ សុភ័ក្រ្ត អធិការរងទទួលផែនយុត្តិធម៌ និង លោកវរសេនីយ៍ត្រី ដា រតនៈ ដឹកនាំកម្លាំងបន្តឈានទៅឃាត់ខ្លួនជនសង្ស័យបានចំនួន ៣នាក់បន្ថែមទៀត នៅចំណុចផ្លូវវិស្វកម្ម ខាងជើងជម្រកស្នាក់នៅបណ្តោះអាសន្នជនភៀសសឹក (ភូមិស្លក្រាម ឃុំស្លក្រាម)៖
១. ឈ្មោះ វ៉ាន នី ភេទប្រុស អាយុ ៣៥ឆ្នាំ៖ ដកហូតបានម្សៅក្រាមពណ៌សថ្លា ២២កូនថង់ និងថ្នាំញៀនប្រភេទគ្រាប់ពណ៌ក្រហមចំនួន ២៦១គ្រាប់ (លទ្ធផលតេស្ត វិជ្ជមាន)។
២.ឈ្មោះ ភី ចាន់នីន (ហៅង៉ោល)ភេទប្រុស អាយុ ៣០ឆ្នាំ (លទ្ធផលតេស្ត វិជ្ជមាន)។
៣. ឈ្មោះ អាង វ៉ាន់ភេទប្រុស អាយុ ២៨ឆ្នាំ (លទ្ធផលតេស្ត វិជ្ជមាន)។
គោលដៅទី៣.បន្តបង្ក្រាបដល់សម្បុកលាក់ខ្លួនក្នុងថ្ងៃដដែល កម្លាំងសមត្ថកិច្ចបានបន្តរុករកទៅដល់ចំណុចជម្រកស្នាក់នៅបណ្តោះអាសន្នជនភៀសសឹក ផ្លូវលេខ២១ ផ្ទះលេខ២៧៦៤ (ភូមិជោគជ័យ) ដោយឃាត់ខ្លួនបានជនសង្ស័យចំនួន ៤នាក់ទៀត (ប្រុស ២នាក់ ស្រី ២នាក់) រួមមាន៖
៤. ឈ្មោះ យ៉ាង គួ ភេទប្រុស អាយុ ២៣ឆ្នាំ៖ រកឃើញម្សៅក្រាមពណ៌សថ្លា ១កូនថង់ (លទ្ធផលតេស្ត វិជ្ជមាន)។
៥. ឈ្មោះ សាំ សាន់ ភេទប្រុស អាយុ ២៧ឆ្នាំ (លទ្ធផលតេស្ត វិជ្ជមាន)។
៦. ឈ្មោះ សំរឹត ចាន់ធី ភេទស្រី អាយុ ២៥ឆ្នាំ៖ សមត្ថកិច្ចរកឃើញម្សៅក្រាមពណ៌សថ្លា ៣កូនថង់ នៅក្នុងផ្ទះ។
៧. ឈ្មោះ ឌុល សា ណាមអយ ភេទស្រី អាយុ ៣០ឆ្នាំ។
ការកោតសរសើរ÷ប្រតិបត្តិការបង្ក្រាបគ្រឿងញៀនដ៏ជោគជ័យនេះ បានស្តែងឱ្យឃើញពីការយកចិត្តទុកដាក់ខ្ពស់ ភាពហ្មត់ចត់ និងការទទួលខុសត្រូវរបស់កងកម្លាំងនគរបាលស្រុកស្វាយចេក ក៏ដូចជាស្នងការដ្ឋាននគរបាលខេត្តបន្ទាយមានជ័យ ក្នុងការលុបបំបាត់បទល្មើសគ្រឿងញៀន ដើម្បីការពារសន្តិសុខ សណ្តាប់ធ្នាប់ និងភាពសុខសាន្តជូនប្រជាពលរដ្ឋនៅក្នុងមូលដ្ឋាន។
បច្ចុប្បន្ន ជនសង្ស័យទាំង ៨នាក់ រួមជាមួយវត្ថុតាង ត្រូវបានកម្លាំងជំនាញរៀបចំសំណុំរឿង បញ្ជូនទៅកាន់តុលាការខេត្តរួចរាល់ហើយ ដើម្បីអនុវត្តទោសទៅតាមផ្លូវច្បាប់យ៉ាងតឹងរ៉ឹងបំផុត៕រាយការណ៍ដោយ លោក សឿន វ៉ាន់ ម៉ាន់លី
