ខេត្តបាត់ដំបង÷ ក្រោមការដឹកនាំបញ្ជាផ្ទាល់ពីថ្នាក់ដឹកនាំ និងការដាក់ចេញនូវវិធានការយ៉ាងម៉ឺងម៉ាត់ក្នុងការលុបបំបាត់គ្រឿងញៀនតាមគន្លង «ភូមិ-ឃុំ-សង្កាត់មានសុវត្ថិភាព» កម្លាំងការិយាល័យជំនាញនៃកងរាជអាវុធហត្ថខេត្តបាត់ដំបង បានបើកប្រតិបត្តិការបង្ក្រាប និងឃាត់ខ្លួនជនសង្ស័យចំនួន ០២នាក់ ពាក់ព័ន្ធករណីប្រើប្រាស់ និងរក្សាទុកដោយខុសច្បាប់នូវសារធាតុញៀន។
ប្រតិបត្តិការដ៏ជោគជ័យនេះ បានធ្វើឡើងកាលពីវេលាម៉ោង ១៣:១០ នាទី ថ្ងៃទី ១៣ ខែមិថុនា ឆ្នាំ២០២៦ ត្រង់ចំណុចភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។
យោងតាមរបាយការណ៍ពីសមត្ថកិច្ច ជនសង្ស័យទាំង ០២នាក់ រួមមាន៖
១. ឈ្មោះ នី សុខឡេង ហៅ កុយ ភេទប្រុស អាយុ ២៣ឆ្នាំ មុខរបរមិនពិតប្រាកដ។
២. ឈ្មោះ ចាន់ វិឆៃ ភេទប្រុស អាយុ ២៣ឆ្នាំ មុខរបរមិនពិតប្រាកដ។
ជនសង្ស័យទាំងពីរនាក់ បច្ចុប្បន្នមានលំនៅឋានក្នុងភូមិទួលតាឯក សង្កាត់ទួលតាឯក ក្រុងបាត់ដំបង ខេត្តបាត់ដំបង។
នៅក្នុងកិច្ចប្រតិបត្តិការវាយឆ្មក់នោះដែរ កម្លាំងកងរាជអាវុធហត្ថបានដកហូតនូវវត្ថុតាងខុសច្បាប់មួយចំនួន រួមមាន៖
គ្រឿងញៀនប្រភេទម្សៅក្រាមពណ៌សថ្លា (ម៉ាទឹកកក/ICE) ចំនួន ០៧កញ្ចប់ (ទម្ងន់សរុប ៣.០១ ក្រាម គិតទាំងសំបកវេចខ្ចប់)។
ទូរស័ព្ទដៃចំនួន ០១គ្រឿង។
កោតសរសើរចំពោះសមត្ថកិច្ចជោគជ័យនៃកិច្ចប្រតិបត្តិការនេះបានសម្ដែង ឱ្យឃើញយ៉ាងច្បាស់ពីការយកចិត្តទុកដាក់ខ្ពស់ ភាពហ្មត់ចត់ និងការទទួលខុសត្រូវលើភារកិច្ចរបស់កម្លាំងជំនាញនៃកងរាជអាវុធហត្ថខេត្តបាត់ដំបង ដែលតែងតែធ្វើសកម្មភាពយ៉ាងសកម្ម យាមល្បាត និងតាមដានស្រាវជ្រាវ ដើម្បីបង្ក្រាបរាល់បទល្មើសទាន់ពេលវេលា។ សកម្មភាពប្រកបដោយវិជ្ជាជីវៈនេះ មិនត្រឹមតែជួយកាត់បន្ថយគ្រោះថ្នាក់ដែលបង្កឡើងដោយគ្រឿងញៀនប៉ុណ្ណោះទេ ប៉ុន្តែថែមទាំងបានចូលរួមចំណែកយ៉ាងធំធេងក្នុងការរក្សាសន្តិសុខ សណ្តាប់ធ្នាប់សាធារណៈ និងផ្តល់ភាពកក់ក្តៅយ៉ាងខ្លាំងដល់ប្រជាពលរដ្ឋក្នុងមូលដ្ឋាន។
បច្ចុប្បន្ន ជនសង្ស័យទាំង ០២នាក់ រួមជាមួយវត្ថុតាង ត្រូវបានឃាត់ខ្លួន និងរក្សាទុកជាបណ្តោះអាសន្ននៅការិយាល័យជំនាញនៃកងរាជអាវុធហត្ថខេត្ត ដើម្បីកសាងសំណុំរឿងតាមនីតិវិធី បញ្ជូនទៅកាន់សាលាដំបូងខេត្តចាត់ការបន្តទៅតាមច្បាប់៕ រាយការណ៍÷ដោយលោកសឿន វ៉ាន់ ម៉ាន់លី
