ខេត្តក្រចេះ÷ ក្រោមការដឹកនាំបញ្ជាផ្ទាល់យ៉ាងម៉ឺងម៉ាត់ និងទាន់ពេលវេលាពី លោកឧត្តមសេនីយ៍ត្រី សាក់ សារ៉ាង មេបញ្ជាការកងរាជអាវុធហត្ថខេត្តក្រចេះ កម្លាំងជំនាញអាវុធហត្ថខេត្ត បានបង្ហាញពីស្មារតីទទួលខុសត្រូវខ្ពស់ និងការប្តេជ្ញាចិត្តយ៉ាងមុតមាំក្នុងការលុបបំបាត់បទល្មើសគ្រឿងញៀន ដោយបានសហការគ្នាយ៉ាងល្អប្រសើរជាមួយកម្លាំងអាវុធហត្ថស្នាក់ការសន្តិសុខ ៧០៩ បើកប្រតិបត្តិការបង្ក្រាបករណីជួញដូរ និងរក្សាទុកដោយខុសច្បាប់នូវសារធាតុញៀន ប្រកបដោយជោគជ័យ និងទាន់ចិត្ត។
ប្រតិបត្តិការដ៏មានប្រសិទ្ធភាពនេះ បានធ្វើឡើងកាលពីថ្ងៃទី១០ ខែមិថុនា ឆ្នាំ២០២៦ នៅចំណុចគីឡូម៉ែត្រលេខ១២៨ (៩៩៩៩) ស្ថិតក្នុងភូមិគ្រញូងសែនជ័យជើង ឃុំគ្រញូងសែនជ័យ ស្រុកស្នួល ខេត្តក្រចេះ។ ក្នុងកិច្ចប្រតិបត្តិការនេះដែរ ក៏មានការសម្របសម្រួលនីតិវិធីយ៉ាងពេញទំហឹងពី លោក ម៉ៅ គឹមហ៊ួរ ព្រះរាជអាជ្ញារង អមសាលាដំបូងខេត្តក្រចេះ ផងដែរ។
ជាលទ្ធផលនៃកិច្ចខិតខំប្រឹងប្រែងរបស់កម្លាំងសមត្ថកិច្ច ជនសង្ស័យចំនួន ០២នាក់ ត្រូវបានឃាត់ខ្លួនភ្លាមៗ រួមជាមួយវត្ថុតាងគ្រឿងញៀនមួយចំនួនធំ។ ក្រោយការឃាត់ខ្លួន កម្លាំងជំនាញបានធ្វើការត្រួតពិនិត្យ ថ្លឹង និងវេចខ្ចប់វត្ថុតាងយ៉ាងម៉ត់ចត់ទៅតាមបច្ចេកទេស ដោយដកហូតបាន៖
ម្សៅក្រាមសថ្លា (សង្ស័យជាសារធាតុញៀនប្រភេទមេតំហ្វេតាមីន ICE) សរុបចំនួន ០៩កញ្ចប់ ដែលមានទម្ងន់សរុបរហូតដល់១៧៣.៧៥ ក្រាម។
កញ្ចប់ទី១ (ទម្ងន់ ៩៨,០២ ក្រាម)៖ ជារបស់ជនសង្ស័យឈ្មោះ ហុងវិចិត្ត ០៨ កញ្ចប់ទៀត(ទម្ងន់ ៧៥,៧៣ ក្រាម)៖ ជារបស់ជនសង្ស័យឈ្មោះ ប៉ាវ ជ្រឹង (ហៅ មា)។ឯកតាមលទ្ធផលនៃការធ្វើតេស្តទឹកនោម គឺបានបង្ហាញលទ្ធផល វិជ្ជមាន (មានសារធាតុញៀន) លើជនសង្ស័យទាំង ២នាក់ នេះតែម្តង។
ការបង្ក្រាបទាន់ពេលវេលានេះ មិនត្រឹមតែជាជោគជ័យថ្មីមួយទៀតរបស់កងរាជអាវុធហត្ថខេត្តក្រចេះប៉ុណ្ណោះទេ ប៉ុន្តែវាបានរួមចំណែកយ៉ាងធំធេងក្នុងការការពារសន្តិសុខ សណ្តាប់ធ្នាប់សង្គម និងការជួយសង្គ្រោះអនាគតយុវជនក្នុងមូលដ្ឋានឲ្យចៀសផុតពីគ្រឿងញៀន ស្របតាមគោលនយោបាយភូមិ-ឃុំ-សង្កាត់មានសុវត្ថិភាព។
បច្ចុប្បន្ន ជនសង្ស័យទាំង ២នាក់ រួមជាមួយវត្ថុតាង ត្រូវបានកម្លាំងជំនាញកងរាជអាវុធហត្ថខេត្តក្រចេះ កសាងសំណុំរឿងបញ្ជូនទៅកាន់សាលាដំបូងខេត្ត ដើម្បីចាត់ការបន្តតាមនីតិវិធីច្បាប់យ៉ាងតឹងរ៉ឹងបំផុត៕ រាយការណ៍÷ដោយលោក សឿន វ៉ាន់ ម៉ាន់លី
