ក្រុងប៉ោយប៉ែត)៖ ថ្នាក់ដឹកនាំរដ្ឋបាលក្រុងប៉ោយប៉ែត និងអាជ្ញាធរមូលដ្ឋាន បានបន្តបង្ហាញពីការយកចិត្តទុកដាក់ខ្ពស់លើបញ្ហាសោភ័ណភាព និងបរិស្ថានក្រុង ដោយនៅព្រឹកថ្ងៃសៅរ៍ ទី១៦ ខែឧសភា ឆ្នាំ២០២៦ នេះ យុទ្ធនាការទ្រង់ទ្រាយធំមួយក្នុងការចុះរៀបចំសណ្ដាប់ធ្នាប់សាធារណៈ និងសម្អាតបរិស្ថាន ត្រូវបានធ្វើឡើងយ៉ាងសកម្មនៅតាមបណ្តោយផ្លូវជាតិលេខ៥ ចំណុចខាងមុខវត្តបាលិលេយ្យ ស្ថិតក្នុងភូមិក្បាលស្ពាន២ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។
យុទ្ធនាការដ៏មានសារៈសំខាន់នេះ ត្រូវបានដឹកនាំផ្ទាល់ដោយ លោក គាត ហ៊ុល អភិបាលនៃគណៈអភិបាលក្រុងប៉ោយប៉ែត លោក វ៉ា ជីម ណារ៉េត ចៅសង្កាត់ អូរជ្រៅ
ដោយមានការអញ្ជើញចូលរួមពីការិយាល័យជំនាញនៃរដ្ឋបាលក្រុង, កម្លាំងអធិការដ្ឋាននគរបាលក្រុង, កម្លាំងប៉ុស្តិ៍រដ្ឋបាលសង្កាត់, មន្ត្រីភូមិ, ប្រជាការពារ និងក្រុមការងារនៃក្រុមហ៊ុនប្រមូលសំរាមស៊ិនទ្រី (Cintri) យ៉ាងច្រើនកុះករ។
សកម្មភាពនាព្រឹកនេះ រួមមានការប្រមូលកម្ទេចកំទីសំរាម ការបោសសម្អាតតាមដងផ្លូវ និងការរៀបចំសណ្ដាប់ធ្នាប់ចរាចរណ៍ ក៏ដូចជាការលក់ដូរដែលរំលោភលើចិញ្ចើមផ្លូវសាធារណៈ ដើម្បីធានាបាននូវខ្យល់អាកាសបរិសុទ្ធ កាត់បន្ថយការកកស្ទះ និងបង្កើនសោភ័ណភាពជុំវិញបរិវេណវត្តបាលិលេយ្យ ដែលជាទីសក្ការបូជាដ៏ថ្លៃថ្លារបស់ពុទ្ធបរិស័ទ។
សកម្មភាពដ៏សស្រាក់សស្រាំរបស់លោកអភិបាលក្រុង និងលោកចៅសង្កាត់ រួមជាមួយកម្លាំងចម្រុះទាំងអស់ ឆ្លុះបញ្ចាំងឱ្យឃើញពីគំរូដឹកនាំដ៏ល្អប្រពៃ មិនប្រកាន់នឿយហត់ និងការទទួលខុសត្រូវខ្ពស់ក្នុងការបម្រើផលប្រយោជន៍សាធារណៈ។ ការចុះផ្ទាល់ដល់ទីតាំងនេះ មិនត្រឹមតែជួយឱ្យទីក្រុងមានរបៀបរៀបរយភ្លាមៗនោះទេ ប៉ុន្តែថែមទាំងជាការដាស់តឿន និងអប់រំផ្សព្វផ្សាយដោយផ្ទាល់ទៅកាន់បងប្អូនប្រជាពលរដ្ឋ និងអាជីវករ ឱ្យមានការយល់ដឹងកាន់តែច្បាស់អំពីកាតព្វកិច្ចថែរក្សាអនាម័យបរិស្ថាន និងការចូលរួមគោរពសណ្ដាប់ធ្នាប់សាធារណៈ។
យុទ្ធនាការនេះ ទទួលបានការកោតសរសើរ និងគាំទ្រយ៉ាងខ្លាំងពីសំណាក់ប្រជាពលរដ្ឋក្នុងមូលដ្ឋាន ក៏ដូចជាអ្នកធ្វើដំណើរឆ្លងកាត់ ដោយពួកគាត់បានលើកឡើងថា សកម្មភាពបែបនេះបានធ្វើឱ្យមុខមាត់នៃក្រុងព្រំដែនប៉ោយប៉ែត កាន់តែមានភាពស្រស់បំព្រង ថ្លៃថ្នូរ និងមានបរិស្ថានរស់នៅល្អប្រសើរឡើងជាលំដាប់៕ សម្រួលអត្ថបទ÷ដោយលោក មុត ចិត្រា ប្រម៉ាញ់ជាយដែន
