រាជធានីភ្នំពេញ÷ កម្លាំងកងរាជអាវុធហត្ថរាជធានីភ្នំពេញ បានបង្ហាញពីប្រសិទ្ធភាពការងារ និងការឆ្លើយតបយ៉ាងរហ័សទាន់ចិត្ត ក្នុងការជួយសង្គ្រោះ និងការពារសន្តិសុខជូនប្រជាពលរដ្ឋ ដោយបានធ្វើការឃាត់ខ្លួនជនសង្ស័យចំនួន ០២នាក់ ករណីបន្លំខ្លួនលួចទ្រព្យសម្បត្តិ (ទូរស័ព្ទដៃ) នៅក្នុងមន្ទីរពេទ្យ។ ហេតុការណ៍បង្ក្រាបនេះ បានធ្វើឡើងកាលពីថ្ងៃទី១៤ ខែឧសភា ឆ្នាំ២០២៦ ម្សិលមិញនេះ នៅក្នុងបរិវេណមន្ទីរពេទ្យតេជោសន្តិភាព ស្ថិតក្នុងខណ្ឌព្រែកព្នៅ រាជធានីភ្នំពេញ។ យោងតាមប្រភពព័ត៌មានពីសមត្ថកិច្ច បានឱ្យដឹងថា មុនពេលកើតហេតុ កម្លាំងអាវុធហត្ថរាជធានីភ្នំពេញ បានទទួលបណ្តឹងផ្ទាល់មាត់ពីសន្តិសុខមន្ទីរពេទ្យ តាមរយៈលេខទូរស័ព្ទបន្ទាន់ ១២៩១ ដើម្បីសុំកិច្ចអន្តរាគមន៍ជាបន្ទាន់ ដោយមានជនសង្ស័យចំនួន ០២នាក់ បានធ្វើសកម្មភាពលួចបន្លំខ្លួនទៅដេកជិតអ្នកមើលថែអ្នកជំងឺ ហើយឆ្លៀតឱកាសលួចយកទូរស័ព្ទ និងទ្រព្យសម្បត្តិរបស់ពួកគាត់។ ក្រោយទទួលបានព័ត៌មានភ្លាម ក្រោមបទបញ្ជាម៉ឺងម៉ាត់ និងការយកចិត្តទុកដាក់ខ្ពស់លើសុវត្ថិភាពពលរដ្ឋ កម្លាំងអាវុធហត្ថរាជធានីភ្នំពេញ ក្នុងមូលដ្ឋានខណ្ឌព្រែកព្នៅ បានចុះអន្តរាគមន៍ដល់កន្លែងកើតហេតុភ្លាមៗដូចរន្ទះ និងធ្វើការឃាត់ខ្លួនជនសង្ស័យទាំង ០២នាក់ រួមមាន៖ ១. ឈ្មោះ ដារ៉ូ ភារុន ភេទប្រុស អាយុ ២០ឆ្នាំ ២. ឈ្មោះ ត្រឹម អាយយុ ភេទប្រុស អាយុ ១៧ឆ្នាំ បច្ចុប្បន្ន ជនសង្ស័យទាំងពីរត្រូវបានបញ្ជូនទៅកាន់ការិយាល័យព្រហ្មទណ្ឌ នៃកងរាជអាវុធហត្ថរាជធានីភ្នំពេញ។ ក្រោមវិធានការជំនាញ និងការសាកសួរយ៉ាងម៉ឺងម៉ាត់ ជនសង្ស័យទាំង ០២នាក់ បានដេកដួលលើភស្តុតាង និងទទួលសារភាពថា ពួកខ្លួនពិតជាបានប្រព្រឹត្តអំពើលួចទូរស័ព្ទរបស់ជនរងគ្រោះពិតប្រាកដមែន។ សមត្ថកិច្ចជំនាញកំពុងកសាងសុំណុំរឿង ដើម្បីបញ្ជូនទៅកាន់តុលាការ ចាត់ការតាមនីតិវិធីច្បាប់។ សកម្មភាពឆ្លើយតបដ៏រហ័ស និងការបង្ក្រាបទាន់ពេលវេលារបស់កម្លាំងកងរាជអាវុធហត្ថរាជធានីភ្នំពេញ នាពេលនេះ ទទួលបានការកោតសរសើរយ៉ាងខ្លាំងពីសំណាក់សាច់ញាតិអ្នកជំងឺ ក៏ដូចជាមហាជនទូទៅ ដែលតែងតែផ្តល់ជំនឿចិត្តខ្ពស់លើខ្សែទូរស័ព្ទបន្ទាន់ ១២៩១ ក្នុងការធានាបាននូវ សន្តិសុខ សុវត្ថិភាព និងភាពកក់ក្តៅជូនប្រជាពលរដ្ឋគ្រប់ពេលវេលា និងគ្រប់ទីកន្លែង៕ រាយការណ៍ ដោយ លោក វង់ សុខ រដ្ឋាអង្គភាព ប្រម៉ាញ់ជាយដែន
