ខេត្តប៉ៃលិន÷កាលពីព្រឹកថ្ងៃទី១៣ ខែឧសភា ឆ្នាំ២០២៦ នៅបរិវេណទីស្នាក់ការអតីតយុទ្ធជនខេត្តប៉ៃលិន បានរៀបចំពិធីអបអរសាទរ ខួបលើកទី១៩ ពិវាអតីតយុទ្ធជនកម្ពុជា(១២ឧសភា) ក្រោមអធិបតីភាពដ៏ខ្ពង់ខ្ពស់ លោកជំទាវបណ្ឌិតបាន ស្រីមុំ អភិបាលនៃគណៈអភិបាលខេត្តប៉ៃលិន និងជាប្រធានសមាគមអតីតយុទ្ធជន និងនិវត្តជនកម្ពុជាខេត្ត។
ក្នុងពិធីដ៏សមោឡាយនេះ ក៏មានការអញ្ជើញចូលរួមពីសំណាក់ លោក ឧត្តមសេនីយ៍ទោសេងសុគន្ធ ស្នងការនៃស្នងការដ្ឋាននគរបាលខេត្តប៉ៃលិន ព្រមទាំងលោក-លោកស្រីស្នងការរង មន្ត្រីក្រោមឱវាទ ថ្នាក់ដឹកនាំមន្ទីរ-អង្គភាពជុំវិញខេត្ត និងបងប្អូនអតីតយុទ្ធជនសរុបប្រមាណ ២៨០នាក់។
មានប្រសាសន៍ក្នុងឱកាសនោះ លោកជំទាវបណ្ឌិត បាន ស្រីមុំ បានថ្លែងនូវការសាកសួរសុខទុក្ខដោយក្តីនឹករលឹក និងបានសម្តែងនូវការដឹងគុណយ៉ាងជ្រាលជ្រៅបំផុត ចំពោះវីរភាពដ៏ឧត្តុង្គឧត្តមរបស់បងប្អូនអតីតយុទ្ធជន។ លោកជំទាវបានបញ្ជាក់ថា សន្តិភាព និងការអភិវឌ្ឍដែលយើងមាននៅថ្ងៃនេះ គឺមិនអាចកាត់ផ្តាច់បានពីការបូជាកម្លាំងកាយចិត្ត សាច់ស្រស់ ឈាមស្រស់ ក្នុងបុព្វហេតុការពារជាតិមាតុភូមិរបស់វីរជនយើងឡើយ។
ដើម្បីជាការលើកទឹកចិត្ត និងតបស្នងចំពោះគុណូបការៈដ៏ថ្លៃថ្លានេះ លោកជំទាវអភិបាលខេត្ត ក៏បាននាំយកនូវអំណោយជាគ្រឿងឧបភោគបរិភោគ និងថវិកាមួយចំនួន ចែកជូនដល់បងប្អូនអតីតយុទ្ធជនគ្រប់ៗគ្នា ក្នុងបរិយាកាសស្និទ្ធស្នាល និងកក់ក្តៅជាទីបំផុត៕ អត្ថបទ ដោយ លោក ស សារឿន
