ខេត្តបាត់ដំបង÷ក្នុងស្មារតីជួយសង្គ្រោះ និងរួមសុខរួមទុក្ខជាមួយប្រជាពលរដ្ឋ អាជ្ញាធរស្រុកភ្នំព្រឹកបានបង្ហាញនូវសកម្មភាពមនុស្សធម៌យ៉ាងឆាប់រហ័ស ក្រោយមានករណីគ្រោះអគ្គិភ័យបានលេបត្របាក់ផ្ទះសម្បែងរបស់ពលរដ្ឋម្នាក់។
កាលពីព្រឹកថ្ងៃអាទិត្យ ទី១៩ ខែមេសា ឆ្នាំ២០២៦ លោក សុង សុភ័ក្រ្ត អភិបាលនៃគណៈអភិបាលស្រុកភ្នំព្រឹក និងជាប្រធានអនុសាខាកាកបាទក្រហមកម្ពុជាស្រុក បានដឹកនាំក្រុមការងារចុះសួរសុខទុក្ខ និងនាំយកអំណោយសង្គ្រោះបន្ទាន់ទៅប្រគល់ជូនផ្ទាល់ដល់ដៃ ស្ត្រីរងគ្រោះឈ្មោះ អ៊ូរ រតនា អាយុ ៣២ឆ្នាំ ដែលកំពុងជួបទុក្ខលំបាកយ៉ាងខ្លាំង បន្ទាប់ពីអគ្គិភ័យបានឆាបឆេះផ្ទះទាំងស្រុង ស្ថិតក្នុងភូមិសាមគ្គី ឃុំពេជ្រចិន្តា ស្រុកភ្នំព្រឹក។ សសកម្មភាពមនុស្សធម៌និងការយកចិត្តទុកដាក់ខ្ពស នៅក្នុងឱកាសដ៏មានអត្ថន័យនោះ លោកអភិបាលស្រុកបានសម្ដែងនូវការសោកស្ដាយជាពន់ពេកចំពោះគ្រោះថ្នាក់ដែលមិននឹកស្មានដល់នេះ។
លោកក៏បាននាំយកនូវអំណោយជាគ្រឿងឧបភោគបរិភោគ និងថវិកា ដើម្បីជួយសម្រាលបន្ទុកជីវភាពបណ្ដោះអាសន្ន រួមមាន៖ ថវិកាចំនួន÷៨០០,០០០ រៀល អង្ករ÷៦០ គីឡូក្រាម គ្រឿង ឧបភោក បរិភោគ មី ១កេស, ទឹកស៊ីអុីវ ១យួរ, ទឹកត្រី ១យួរ ប៊ីចេង ១គីឡូក្រាម, ស្ករស ១គីឡូក្រាម និងប្រេងឆា ១លីត្រ ការកោតសរសើរចំពោះថ្នាក់ដឹកនាំស្រុក សកម្មភាពនេះបានឆ្លុះបញ្ចាំងឱ្យឃើញពីការយកចិត្តទុកដាក់ខ្ពស់របស់អាជ្ញាធរស្រុកភ្នំព្រឹក ដែលតែងតែនៅក្បែរប្រជាពលរដ្ឋគ្រប់កាលៈទេសៈ ពិសេសនៅពេលមានអាសន្នអន់ក្រ។
ការចុះជួយដោយផ្ទាល់ និងទាន់ពេលវេលារបស់ លោកសុងសុភ័ក្រ្ត មិនត្រឹមតែជាការផ្ដល់នូវសម្ភារប៉ុណ្ណោះទេ ប៉ុន្តែគឺជាការផ្ដល់នូវកម្លាំងចិត្តដ៏ធំធេងដល់ជនរងគ្រោះ ឱ្យមានសង្ឃឹមក្នុងជីវិតឡើងវិញ។ ជាមួយគ្នានេះ លោកអភិបាលស្រុក ក៏បានក្រើនរំលឹកដល់បងប្អូនប្រជាពលរដ្ឋទាំងអស់ ឱ្យមានការប្រុងប្រយ័ត្នខ្ពស់ចំពោះគ្រោះអគ្គិភ័យ ពិសេសក្នុងរដូវក្ដៅនេះ ដោយត្រូវពិនិត្យមើលចង្ក្រានហ្គាស អគ្គិសនី និងការដុតសម្រាមផ្សេងៗ ដើម្បីចៀសវាងនូវការបាត់បង់ទ្រព្យសម្បត្តិ និងអាយុជីវិតជាយថាហេតុ៕ អត្ថបទ÷ដោយ លោក មុតចិត្រា ប្រម៉ាញ់ជាយដែន
