ខេត្តបាត់ដំបង÷ស្រុកសំពៅលូន នាព្រឹកថ្ងៃទី ២៦ ខែមីនា ឆ្នាំ២០២៦ ក្នុងស្មារតីយកចិត្តទុកដាក់ខ្ពស់លើសុខទុក្ខ និងជីវភាពរបស់កម្លាំងស្ម័គ្រចិត្តដែលកំពុងបម្រើការងារនៅមូលដ្ឋាន នាថ្ងៃនេះ ថ្នាក់ដឹកនាំរដ្ឋបាលស្រុកសំពៅលូន បានអញ្ជើញចុះសួរសុខទុក្ខ និងចែកជូននូវឯកសណ្ឋាន ព្រមទាំងគ្រឿងឧបភោគបរិភោគ ដល់កម្លាំងប្រជាការពារឃុំសន្តិភាព ដើម្បីជាការលើកទឹកចិត្ត និងពង្រឹងប្រសិទ្ធភាពការងារសន្តិសុខសណ្តាប់ធ្នាប់។
ពិធីសំណេះសំណាលនេះ ត្រូវបានរៀបចំឡើងយ៉ាងកក់ក្តៅ ក្រោមអធិបតីភាពដ៏ខ្ពង់ខ្ពស់ពីសំណាក់៖
១. លោក ផុន ផែន ប្រធានក្រុមប្រឹក្សាស្រុកសំពៅលូន
២. លោក ហម សំខាន់ អភិបាលនៃគណៈអភិបាលស្រុកសំពៅលូន
៣. លោកវរសេនីយ៍ទោ ទឹម វិឆ័យ អធិការនៃអធិការដ្ឋាននគរបាលស្រុកសំពៅលូន
៤. លោក ស្រី អ៊ូច ធឿន មេឃុំសន្តិភាព
ព្រមទាំងមានការអញ្ជើញចូលរួមពីក្រុមការងារចុះជួយមូលដ្ឋានសរុបចំនួន ៣៥ នាក់។
នៅក្នុងឱកាសនោះ កម្លាំងប្រជាការពារឃុំសន្តិភាពចំនួន ៨២ នាក់ (ស្រី ០៣ នាក់) បានចូលរួមស្ដាប់នូវការផ្ដាំផ្ញើសួរសុខទុក្ខ និងការផ្សព្វផ្សាយយ៉ាងស៊ីជម្រៅអំពី គោលនយោបាយ ភូមិ ឃុំ សង្កាត់មានសុវត្ថិភាព ដើម្បីធានាបាននូវការរស់នៅប្រកបដោយភាពសុខសាន្តជូនប្រជាពលរដ្ឋក្នុងមូលដ្ឋាន។
ថ្នាក់ដឹកនាំបានសម្តែងនូវការកោតសរសើរដោយស្មោះចំពោះស្មារតីលះបង់ និងការខិតខំប្រឹងប្រែងរបស់កម្លាំងប្រជាការពារទាំងអស់ ដែលបានចំណាយកម្លាំងកាយចិត្ត ជួយសម្រួលដល់ការងារសមត្ថកិច្ច ក្នុងនាមជា “ដៃជើង” ដ៏រឹងមាំនៅមូលដ្ឋាន។ ដើម្បីជាការតបស្នង និងជួយសម្រាលបន្ទុកជីវភាព ថ្នាក់ដឹកនាំបាននាំយកនូវអំណោយជូនដល់កម្លាំងប្រជាការពារម្នាក់ៗរួមមាន៖
ឯកសណ្ឋានប្រជាការពារ ចំនួន ០១ កំប្លេ (សម្រាប់ប្រើប្រាស់ក្នុងប្រតិបត្តិការងារ)គ្រឿង ឧបភោកបរិភោគ
មី ០១ កេស, ទឹកត្រី ០១ យួរ, ទឹកស៊ីអ៊ីវ ០១ យួរ និងទឹកសុទ្ធ ០១ យួរ។
សកម្មភាពនេះមិនត្រឹមតែជាការចែករំលែកសម្ភារប៉ុណ្ណោះទេ ប៉ុន្តែគឺជាការបង្ហាញនូវគុណធម៌ និងសបុរធម៌ ដ៏ខ្ពង់ខ្ពស់របស់ថ្នាក់ដឹកនាំ ដែលតែងតែនៅកៀកកិតជាមួយមន្ត្រីថ្នាក់ក្រោម និងកម្លាំងជំនួយ។ ការយកចិត្តទុកដាក់នេះ គឺជាចលករដ៏សំខាន់ក្នុងការជំរុញទឹកចិត្តឱ្យកម្លាំងប្រជាការពារ កាន់តែមានឆន្ទៈមោះមុតក្នុងការការពារសុខសុវត្ថិភាពជូនបងប្អូនប្រជាពលរដ្ឋ ក៏ដូចជាការចូលរួមចំណែកអភិវឌ្ឍន៍សង្គមជាតិទាំងមូល។
ជាទីបញ្ចប់ ថ្នាក់ដឹកនាំបានសង្កត់ធ្ងន់ថា “សន្តិសុខកើតចេញពីការចូលរួមរបស់បងប្អូនទាំងអស់គ្នា” ហើយការសាមគ្គីគ្នារវាងអាជ្ញាធរ សមត្ថកិច្ច និងប្រជាការពារ គឺជាគ្រឹះដ៏រឹងមាំបំផុតសម្រាប់ ឃុំសន្តិភាពស្រុកសំពៅលូន ទាំងមូល។
ដោយ មុត ចិត្រា ប្រម៉ាញ់ជាយដែន
