ខេត្តកោះកុង៖ យុត្តិធម៌បានមកដល់ហើយសម្រាប់អាជីវករ និងពលរដ្ឋដែលរកស៊ីតាមដងផ្លូវជាតិលេខ ៤៨! លោក ម៉ៅ សាន់សូនាមន្ត្រីគយប្រចាំប៉ុស្តិ៍អណ្ដូងទឹក ដែលល្បីល្បាញខាង “ជម្រិតទារប្រាក់” គ្រប់ច្រកល្ហក ត្រូវបានអង្គភាពប្រឆាំងអំពើពុករលួយ (ACU) ឃាត់ខ្លួនជាផ្លូវការហើយ កាលពីពេលថ្មីៗនេះ ពាក់ព័ន្ធនឹងករណីពុករលួយ និងការទារប្រាក់ពីជនជាតិចិនជាច្រើនករណី។
តាមប្រភពព័ត៌មានបានឱ្យដឹងថា មន្ត្រីគយរូបនេះមិនត្រឹមតែដាក់គោលដៅលើអាជីវករធំៗប៉ុណ្ណោះទេ សូម្បីតែពលរដ្ឋដឹកអីវ៉ាន់រុះរើផ្ទះ ដឹកបន្លែត្រីសាច់ ឬឡានដឹកអេតចាយ ក៏មិនលើកលែងដែរ៖
តម្រូវឱ្យបង់លុយ “ថ្លៃបាយ” ពី ១៥ម៉ឺនទៅ ៤០ម៉ឺនរៀល។ជាថ្នូរនឹងការដោះលែង។
រណីខ្លះទារប្រាក់រហូតដល់ រាប់ពាន់ ដុល្លារអាមេរិក ទើបអនុញ្ញាតឱ្យឡានបន្តដំណើរទៅមុខបាន។
លោក ម៉ៅ សាន់សូនា ធ្លាប់ត្រូវបានថ្នាក់លើដកបញ្ឈរជើងម្ដងរួចមកហើយ ជុំវិញរឿងអាស្រូវទារលុយ ពីអ្នកដឹកគ្រឿងសមុទ្រ ប៉ុន្តែក្រោយមកបែរជាមានឱកាសត្រឡប់មកកាន់តំណែងដដែល និងបង្កើនសកម្មភាពពុករលួយខ្លាំងជាងមុនដើម្បី “ស្រង់ដើម”។
ការចាប់ខ្លួនមន្ត្រីរូបនេះ បានធ្វើឱ្យអាជីវករ និងប្រជាពលរដ្ឋក្នុងខេត្តកោះកុង សម្ដែងការត្រេកអរ និងសាទរយ៉ាងខ្លាំងចំពោះចំណាត់ការដ៏ម៉ឺងម៉ាត់របស់អង្គភាពប្រឆាំងអំពើពុករលួយ។ ទន្ទឹមនឹងនេះ មហាជនក៏បានដាក់សំណួរ និងសំណូមពរឱ្យ ACU ពិនិត្យមើលទៅលើលោក ទុំណូ ប្រធានសាខាគយខេត្តកោះកុងផងដែរ ថាតើមានការជាប់ពាក់ព័ន្ធ ឬបើកដៃឱ្យមន្ត្រីក្រោមឱវាទធ្វើព្យុះធ្វើភ្លៀងបែបនេះដែរឬទេ?
បច្ចុប្បន្ន ជនសង្ស័យកំពុងស្ថិតក្នុងចំណាត់ការតាមនីតិវិធីច្បាប់ ខណៈដែលពលរដ្ឋសង្ឃឹមថា ករណីនេះនឹងក្លាយជាមេរៀនសម្រាប់មន្ត្រីខិលខូចដទៃទៀត ដែលយកអំណាចតួនាទីមកគៀបសង្កត់រាស្ត្រស្លូតត្រង់។ដោយ មុត ចិត្រា ប្រម៉ាញ់ជាយដែន
