ខេត្តព្រៃវែង៖ ភាពមិនប្រក្រតីនៅស្ថានីយជញ្ជីងថ្លឹងរថយន្ត លើផ្លូវជាតិលេខ១ ស្ថិតក្នុងភូមិក្រសារជេទ ឃុំរំចេក ស្រុកព្រះស្តេច កំពុងក្លាយជាប្រធានបទក្តៅគគុក ក្រោយពីក្រុមអាជីវករ និងអ្នកដឹកជញ្ជូនទំនិញ បានទម្លាយថា មន្ត្រីប្រចាំការនៅទីនោះ កំពុងអនុវត្តផ្ទុយពីច្បាប់ និងមានចរិតពុករលួយជាប្រព័ន្ធ។
ការទារលុយមិនថាឡានដឹកលើសទម្ងន់ ឬមិនលើសនោះទេ គឺត្រូវតែបង់ប្រាក់តាមការកំណត់របស់ប្រធាន និងអនុប្រធានស្ថានីយ ក្រោមរូបភាព «ថ្លៃបាយ ទឹក និងកាហ្វេ»។
ប្រភពផ្ទៃក្នុងពីមន្ទីរសាធារណការខេត្តព្រៃវែងដែលមិនបានលាភសក្ការៈដាក់ក្នុងហោប៉ៅ បានបង្ហើបប្រាប់អង្គភាពអ្នកសារព័ត៌មានយើងឱ្យដឹងថា សកម្មភាពប្រមូលលុយទាំងយប់ទាំងថ្ងៃនេះ អាចមានការបើកដៃពីសំណាក់លោក អ៊ុន សុធា ប្រធានមន្ទីរសាធារណការ និងដឹកជញ្ជូនខេត្តព្រៃវែង។
យោងតាមប្រភពពីក្រុមរថយន្តដឹកទំនិញតូច ធំបានបង្ហើរប្រាប់ឲ្យដឹងទៀតថា ដើម្បីគេចចេញពីការសង្កត់កទារលុយ អ្នកបើកបរមួយចំនួនបានវាង ទៅប្រើប្រាស់ផ្លូវតូចៗក្នុងភូមិ ដែលបណ្តាលឱ្យផ្លូវដទៃទៀតឆាប់ខូចខាតមុនអាយុកាល។
អាស្រ័យហេតុនេះ ក្រុមអាជីវករ និងមហាជន សំណូមពរយ៉ាងទទូចដល់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន, ឯកឧត្តម សួន សុម៉ាលីន អភិបាលខេត្តព្រៃវែង ជាពិសេស ឯកឧត្តមទេសរដ្ឋមន្ត្រី ឱម យុិនទៀង ប្រធានអង្គភាពប្រឆាំងអំពើពុករលួយ (ACU) មេត្តាចាត់មន្ត្រីជំនាញចុះស៊ើបអង្កេតឱ្យបានស៊ីជម្រៅ ដើម្បីលុបបំបាត់ភាពអសកម្ម និងពង្រឹងការអនុវត្តច្បាប់ឱ្យមានតម្លាភាព។
អង្គភាពសារព័ត៌មានយើងខ្ញុំ ផ្សព្វផ្សាយព័ត៌មាននេះ គ្រាន់តែចង់ជម្រាបជូនមហាជន នឹងថ្នាក់ដឹកនាំ ជ្រាបជាព័ត៌មាន ក្នុងព្រឹត្តិការណ៍អ្វីដែលកើតមាននៅក្នុងមូលដ្ឋានតែប៉ុណ្ណោះ។
អង្គភាព គេហទំព័រ ប្រម៉ាញ់ជាយ ដែន TVយើង គ្រាន់តែជាកញ្ចក់ឆ្លុះបញ្ចាំង រិះគន់ ក្នុងន័យស្ថាបនា និងសូមរង់ចាំការឆ្លើយបំភ្លឺគ្រប់ស្ថាប័នពាក់ព័ន្ធ គ្រប់ពេលម៉ោងធ្វើការតាមរបប អ្នកសារព័ត៌មាន សូមអរគុណ។ ដោយ មុតចិត្រា ប្រម៉ាញ់ជាយដែន
