(ភ្នំពេញ)៖ កម្លាំងនគរបាលព្រហ្មទណ្ឌ នៃអធិការដ្ឋាននគរបាលខណ្ឌចំការមន បានបើកប្រតិបត្តិការបង្ក្រាប និងឃាត់ខ្លួនក្រុមដ្មេងទំនើងចំនួន ០៨នាក់ ពាក់ព័ន្ធនឹងសកម្មភាពជិះម៉ូតូបោះបោល បង្ហោះ និងជ្រេគ្នាយ៉ាងអនាធិបតេយ្យតាមដងផ្លូវសាធារណៈ ដែលបង្កឱ្យមានការរំខាន និងគ្រោះថ្នាក់ដល់អ្នកដំណើរ។
សេចក្តីរាយការណ៍ពីហេតុការណ៍
កិច្ចប្រតិបត្តិការនេះបានធ្វើឡើងនៅវេលាម៉ោង ១:១០នាទីយប់រំលងអធ្រាត្រ ឈានចូលថ្ងៃទី៨ ខែកុម្ភៈ ឆ្នាំ២០២៦ នៅចំណុចផ្លូវព្រះមុន្នីវង្ស ស្ថិតក្នុងភូមិ៧ សង្កាត់បឹងត្របែក ខណ្ឌចំការមន រាជធានីភ្នំពេញ។ ក្នុងនោះ សមត្ថកិច្ចបានដកហូតម៉ូតូចំនួន ០៤គ្រឿង ដែលជាមធ្យោបាយសម្រាប់ធ្វើសកម្មភាព។
អត្តសញ្ញាណក្មេងទំនើងទាំង ០៨នាក់
យោងតាមរបាយការណ៍របស់សមត្ថកិច្ច ជនសង្ស័យដែលត្រូវបានឃាត់ខ្លួនរួមមាន៖
១. ឈ្មោះ ដែន រដ្ឋា ភេទប្រុស អាយុ ១៦ឆ្នាំ (សិស្ស)
២. ឈ្មោះ ជួន បញ្ញា ភេទប្រុស អាយុ ១៧ឆ្នាំ (បុគ្គលិកដឹកជញ្ជូន)
៣. ឈ្មោះ ឆេង ដារាហៃ ភេទប្រុស អាយុ ១៥ឆ្នាំ (ជាងជួសជុលរថយន្ត)
៤. ឈ្មោះ ហ៊ុល វណ្ណៈ ភេទប្រុស អាយុ ១៨ឆ្នាំ (សិស្ស)
៥. ឈ្មោះ ពៅ ស៊ីហេង ភេទប្រុស អាយុ ១៦ឆ្នាំ (សិស្ស)
៦. ឈ្មោះ ចិន ទុយ ភេទប្រុស អាយុ ២៥ឆ្នាំ (បុគ្គលិកដឹកជញ្ជូន)
៧. ឈ្មោះ ផេង ផៃឡុង ភេទប្រុស អាយុ ១៧ឆ្នាំ (គ្មានមុខរបរពិតប្រាកដ)
៨. ឈ្មោះ កែវ ទិព្ធវិបុល ភេទប្រុស អាយុ ១៩ឆ្នាំ (ជាងអគ្គិសនី)
វិធានការបន្តរបស់សមត្ថកិច្ច
ក្រោយការឃាត់ខ្លួន និងសាកសួរ សមត្ថកិច្ចបានសម្រេចអនុវត្តវិធានការរដ្ឋបាល ដោយបានធ្វើការអប់រំណែនាំ និងឱ្យសាមីខ្លួនធ្វើកិច្ចសន្យាបញ្ឈប់សកម្មភាពបង្កការអសន្តិសុខបែបនេះបន្តទៀត។ ដោយឡែក ចំពោះវត្ថុតាងដែលជាម៉ូតូទាំង ០៤គ្រឿង ត្រូវបានដកហូតយកមករក្សាទុកនៅអធិការដ្ឋាននគរបាលខណ្ឌចំការមន ជាបណ្ដោះអាសន្នក្នុងរយៈពេល ០៣ខែ មុននឹងអនុញ្ញាតឱ្យម្ចាស់យកត្រឡប់ទៅវិញតាមនីតិវិធី។
ការបង្ក្រាបនេះ គឺជាផ្នែកមួយនៃយុទ្ធនាការរឹតបន្តឹងសន្តិសុខ និងសណ្តាប់ធ្នាប់សាធារណៈ របស់រដ្ឋបាលរាជធានីភ្នំពេញ ដើម្បីការពារសុវត្ថិភាពជូនបងប្អូនប្រជាពលរដ្ឋដែលធ្វើដំណើរតាមដងផ្លូវ៕ដោយ លោក វង់ សុខរដ្ឋា
