ខេត្តពោធិ៍សាត់៖ នៅថ្ងៃទី១៨ ខែតុលា ឆ្នាំ២០២៥ ក្រោយពីទទួលបានករណីរាយការណ៍បទល្មើសគ្រឿងញៀនពីប្រជាពលរដ្ឋក្នុងមូលដ្ឋានខេត្តពោធិ៍សាត់ ឯកឧត្តមនាយឧត្ដមសេនីយ៍ អគ្គលេខាធិការ និងជាប្រធានគណៈកម្មការគ្រប់គ្រងទូរស័ព្ទដៃ NoDrug បានបញ្ជាទៅលោកឧត្ដមសេនីយ៍ទោ ឃន តារាសម្បត្តិ អគ្គលេខាធិការរង និងជាប្រធានអនុគណៈកម្មការប្រចាំបញ្ជា២៤ម៉ោង សហការនិងបញ្ជូនព័ត៌មានភ្លាមទៅកាន់សមត្ថកិច្ចជំនាញនៅមូលដ្ឋាន ដើម្បីចាត់វិធានការស្រាវជ្រាវ និងឈានដល់ការបង្ក្រាបករណីគ្រឿងញៀនដែលជាកង្វល់របស់ប្រជាពលរដ្ឋបានរាយការណ៍មកកាន់សមត្ថកិច្ច។
បន្ទាប់ពីស្នងការដ្ឋាននគរបាលខេត្តពោធិ៍សាត់បានទទួលព័ត៌មាន បានចាត់តាំងលោកវរសេនីយ៍ឯក ហែម មុនី ស្នងការរងទទួលផែនការងារប្រឆាំងគ្រឿងញៀន សហការជាមួយវរសេនីយ៍ទោ ជា ប៉ារីស អធិការនគរបាលស្រុកវាលវែង និងកម្លាំងមានសមត្ថកិច្ចពាក់ព័ន្ធ ដោយមានការដឹកនាំសម្របសម្រួលពីឯកឧត្ដម កូយ កាន់យ៉ា ព្រះរាជអាជ្ញានៃអយ្យការអមសាលាដំបូងខេត្ត បានធ្វើការស្រាវជ្រាវតាមនីតិវិធី និងចុះឆែកឆេរនៅចំណុចភោជនីយដ្ឋាន និងផ្ទះសំណាក់ ស្ទីម សូណា ស្ប៉ា មានស្លាកយីហោ ថ្មដាមានលាភ ស្ថិតក្នុងភូមិសង្គមថ្មី ឃុំថ្មដា ស្រុកវាលវែង ខេត្តពោធិ៍សាត់។
ផ្អែកតាម ព័ត៌មានការរាយការណ៍របស់ប្រជាពលរដ្ឋ លទ្ធផលស្រាវជ្រាវកម្លាំងមានសមត្ថកិច្ចពាក់ព័ន្ធ និងចម្លើយសារភាពជនសង្ស័យជុំវិញករណីនេះ បានបង្ក្រាបករណី “រក្សាទុក ជួញដូរ និងប្រើប្រាស់ដោយខុសច្បាប់នូវសារធាតុញៀន” នៅចំណុចទីតាំងខាងលើដោយឃាត់ខ្លួនជនសង្ស័យសរុបចំនួន ៦នាក់ (ស្រី ៥នាក់) វិជ្ជមានសារធាតុញៀន(+) ក្នុងនោះមានជនជាតិវៀតណាម ៤នាក់ និងបានដកហូតវត្ថុតាង រួមមាន៖
១- ម្សៅក្រាមសថ្លាសង្ស័យសារធាតុញៀន (មេតំហ្វេតាមីន ICE) ចំនួន ១៦កញ្ចប់ ទម្ងន់ ១២៤,០៦ក្រាម
២- ម្សៅកេតាមីន (ហៅ K) ចំនួន ១៣កញ្ចប់ ទម្ងន់ ១២១,០៣ក្រាម
៣- ថ្នាំគ្រាប់ពណ៌ក្រហម (WY) ប្រភេទកេតាមីន ចំនួន ២កញ្ចប់ ស្មើ ៩៣គ្រាប់ ទម្ងន់ ៩.៥០ក្រាម
៤- ថ្នាំគ្រាប់ពណ៌ទឹកក្រូច ប្រភេទកេតាមីន ចំនួន ១កញ្ចប់ ស្មើ ៥២គ្រាប់ ទម្ងន់ ១៨.៤៩ក្រាម
៥- ជញ្ជីងថ្លឹងគ្រឿងញៀន ចំនួន ១គ្រឿង
៦- ក្ដាសម្រាប់ប្រើប្រាស់គ្រឿងញៀន ចំនួន ២
៧- អំពូលសម្រាប់ប្រើប្រាស់គ្រឿងញៀន ចំនួន ៥
៨- ទូរស័ព្ទ ចំនួន ៨គ្រឿង
៩- ម៉ូតូ ចំនួន ១គ្រឿង។
បច្ចុប្បន្នជនសង្ស័យនិងវត្ថុតាង បានកសាងសំណុំរឿងបញ្ជូនទៅកាន់សាលាដំបូងខេត្តពោធិ៍សាត់ ចាត់ការតាមនីតិវិធីច្បាប់។
