ភ្នំពេញ÷ ស្របពេលដែលរាជរដ្ឋាភិបាលកំពុងរឹតបន្តឹងការប្រមូលថវិកាជាតិ ស្រាប់តែមានការធ្លាយចេញនូវភាពមិនប្រក្រតីដ៏ធំមួយ បង្ហាញពីខ្វះចន្លោះក្នុងការគ្រប់គ្រង និងការទទួលខុសត្រូវរបស់មន្ត្រីគយថ្នាក់ខេត្ត។ ជាក់ស្តែង កម្លាំងពិសេសនៃនាយកដ្ឋានបង្ការ និងបង្ក្រាបបទល្មើស (គយចល័ត) នៃអគ្គនាយកដ្ឋានគយ និងរដ្ឋាករកម្ពុជា បានសហការជាមួយព្រះរាជអាជ្ញា និងអាជ្ញាធរមូលដ្ឋាន ចុះវាយឆ្មក់ពិនិត្យទីតាំងស្តុកទំនិញសង្ស័យចំនួនពីរ កាលពីព្រឹកថ្ងៃទី៣ ខែមិថុនា ឆ្នាំ២០២៦ កន្លងទៅ ដោយបានរកឃើញ និងឃាត់ទុកទំនិញគេចពន្ធ ក៏ដូចជាទំនិញបង់ពន្ធមិនគ្រប់ទម្ងន់ សរុបជាង ៣០តោន នៅក្នុងភូមិសាស្ត្រខេត្តកណ្តាល និងខេត្តតាកែវ។
ការចុះបង្ក្រាបជាបន្តបន្ទាប់របស់កម្លាំងគយចល័តទូទាំងប្រទេសនេះ ធ្វើឡើងបន្ទាប់ពីកម្លាំងជំនាញបានស្រាវជ្រាវឃើញថា មានលំហូរទំនិញចម្រុះគេចពន្ធ និងបង់ពន្ធមិនគ្រប់ចំនួនរាប់សិបតោន បានលួចលាក់ឆ្លងដែនចូលមកប្រទេសកម្ពុជា តាមច្រកព្រំដែននានា។ អ្វីដែលជាការកត់សម្គាល់ និងបង្កើតជាមន្ទិលសង្ស័យពីមហាជននោះគឺ ហេតុអ្វីបានជាទំនិញខុសច្បាប់វាយលុកចូលមកយ៉ាងគំហុកបែបនេះ បែរជាប្រធានសាខាគយ និងរដ្ឋាករខេត្តទាំងពីរ ហាក់រក្សាភាពស្ងៀមស្ងាត់ គ្មានវិធានការទប់ស្កាត់ ឬបង្ក្រាបទាល់តែសោះ? រហូតមានការរិះគន់ថា អាចជារឿង «ភួយធំបន្លំដេក» ឬមានការបើកដៃណាមួយដែរឬទេ?
តាមរបាយការណ៍ បង្ក្រាបនៅទីតាំងទាំងពីររួមមាន៖
ទីតាំងទី១ក្នុងស្រុកសំពៅពូនខេត្តកណ្ដាលកម្លាំងគយចល័តបានរកឃើញសាច់បង្កកគ្មានច្បាប់ជាង ១៨តោន និងគ្រឿងទេសជាង ៧តោន (សរុប ២៥តោន) នៅក្នុងឃ្លាំងស្តុកទំនិញមួយកន្លែងរបស់ជនជាតិចិន ស្ថិតក្នុងភូមិព្រែកស្បូវ សង្កាត់សំពៅពូន។ ទីតាំងនេះ ស្ថិតក្រោមការគ្រប់គ្រង និងទទួលខុសត្រូវផ្ទាល់របស់ លោក សំ កុសល ប្រធានសាខាគយ និងរដ្ឋាករខេត្តកណ្តាល។ ពាក់ព័ន្ធនឹងករណីនេះ នៅពេលអ្នកសារព័ត៌មានយើង ព្យាយាមទាក់ទងតាមទូរស័ព្ទកាលពីរសៀលថ្ងៃទី៨ ខែមិថុនា ឆ្នាំ២០២៦ ចូលទៅលេខទូរស័ព្ទដែលធ្លាប់ប្រើប្រាស់ បុគ្គលនោះបែរជាឆ្លើយបដិសេធយ៉ាងខ្លីថា ខ្លួនមិនមែនឈ្មោះ សំ កុសល នោះឡើយ ដែលនេះជាទង្វើគេចវេសពីការបកស្រាយជុំវិញការធ្វេសប្រហែសក្នុងតួនាទី។
ទីតាំងទី២ ក្នុងស្រុកអង្គរបុរីខេត្តតាកែវ មន្ត្រីគយចល័តបានបន្តត្រួតពិនិត្យឃ្លាំងស្តុកទំនិញមួយកន្លែងទៀត នៅក្នុងភូមិពុទ្ធ្រា ឃុំគោកធ្លក ដោយបានរកឃើញទំនិញចម្រុះបង់ពន្ធមិនគ្រប់ចំនួនជាង ១០តោន។ ទីតាំងនេះ ស្ថិតក្រោមការទទួលខុសត្រូវរបស់លោក ស៊ុន ឆាយ ប្រធានសាខាគយ និងរដ្ឋាករខេត្តតាកែវ។ ក្រុមអ្នកសារព័ត៌មានយើង ក៏បានព្យាយាមហៅទូរស័ព្ទទៅលោកប្រធានសាខាជាច្រើនដងដើម្បីសុំការបំភ្លឺ ប៉ុន្តែគ្មានអ្នកទទួលទូរស័ព្ទនោះឡើយ។
ប្រភពពីមន្ត្រីគយមួយរូប (សុំមិនបញ្ចេញឈ្មោះ) បានបង្ហើបឱ្យដឹងកាលពីថ្ងៃទី៧ ខែមិថុនា ថា ការដែលថ្នាក់លើចាត់កម្លាំងគយចល័តចុះមកបង្ក្រាបផ្ទាល់ដល់មូលដ្ឋានបែបនេះ គឺដើម្បីទប់ស្កាត់ការរត់ពន្ធទំនិញខុសច្បាប់យ៉ាងទាន់ពេលវេលា ការពារសុខភាពប្រជាពលរដ្ឋ និងដើម្បីកុំឱ្យបាត់បង់ចំណូលថវិកាជាតិ។ បច្ចុប្បន្ន កម្លាំងគយចល័តកំពុងបន្តអនុវត្តនីតិវិធីច្បាប់ ដោយតម្រូវឱ្យម្ចាស់ទំនិញចូលខ្លួនមកបង់ពន្ធ និងរងការពិនិត្យពិន័យទៅតាមច្បាប់ស្តីពីគយនៃព្រះរាជាណាចក្រកម្ពុជា។
ជាមួយគ្នានេះ មហាជនកំពុងសម្លឹងមើល និងរំពឹងយ៉ាងមុតមាំថា លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា នឹងមានវិធានការរដ្ឋបាលផ្ទៃក្នុងដ៏ម៉ឺងម៉ាត់ ដើម្បីដុសក្អែល និងពង្រឹងការទទួលខុសត្រូវរបស់មន្ត្រីថ្នាក់ក្រោម ជាពិសេសប្រធានសាខាគយខេត្តទាំងពីរ ដែលបណ្តោយឱ្យមានរឿងអាស្រូវនេះកើតឡើង។
គួររំលឹកផងដែរថា កាលពីខែឧសភា ឆ្នាំ២០២៦ កន្លងទៅ កម្លាំងពិសេសគយចល័តក៏ធ្លាប់បានចុះបង្ក្រាបទំនិញលោតឆត្រនៅតំបន់ព្រំដែនភ្នំដិន ស្រុកគិរីវង់ ខេត្តតាកែវ ដោយឆែកឆេរឃ្លាំងធំៗចំនួនបី និងរកឃើញទំនិញគេចពន្ធជាច្រើនមុខ ក្នុងនោះរួមមានប្រេងក្លែងក្លាយជាង ២០០ធុង (ចំណុះ ២២០លីត្រក្នុងមួយធុង)។ តែប៉ុន្មានថ្ងៃបន្ទាប់ពីនោះ គយចល័តតំបន់២ ក៏បានឃាត់ខ្លួនរថយន្តសាំយ៉ុងចំនួន ១៣គ្រឿងបន្ថែមទៀត ដែលក្រុមឈ្មួញបានប្រើប្រាស់ដើម្បីលួចបន្លំផ្ទេរទំនិញពីរថយន្តធំៗយកមកដឹកជញ្ជូនបន្ត។ សកម្មភាពបទល្មើសកើតឡើងដដែលៗក្នុងខេត្តតាកែវនេះ បានស្តែងឱ្យឃើញយ៉ាងច្បាស់ពីភាពកម្សោយ ឬភាពមិនប្រក្រតីនៃមន្ត្រីគយប្រចាំការនៅមូលដ្ឋាននោះតែម្តង។
ពាក់ព័ន្ធនឹងករណីនេះ លោក សែ សុឃន អគ្គនាយករង និងជាអ្នកនាំពាក្យនៃអគ្គនាយកដ្ឋានគយ និងរដ្ឋាករកម្ពុជា ធ្លាប់បានបញ្ជាក់កាលពីថ្ងៃទី៣០ ខែឧសភា ថា មន្ត្រីគយទាំងអស់ត្រូវផ្តល់សេវាសាធារណៈប្រកបដោយគុណភាព តម្លាភាព និងប្រមូលកម្រៃស្របតាមផ្លូវការ។ លោកបានសង្កត់ធ្ងន់ថា សាខាគយខេត្តត្រូវចាត់កម្លាំងប្រចាំការដើម្បីទប់ស្កាត់ និងបង្ក្រាបការរត់គេចពន្ធតាមច្រកព្រំដែនឱ្យខានតែបាន ចំណែកអាជីវករ និងជើងសាគយត្រូវមានកាតព្វកិច្ចបង់ពន្ធគយឱ្យបានត្រឹមត្រូវតាមប្រភេទ និងបរិមាណទំនិញជាក់ស្តែង។
ផ្ទុយទៅវិញ ការបណ្តោយឱ្យមានទំនិញខុសច្បាប់ និងបង់ពន្ធមិនគ្រប់ក្នុងបរិមាណដ៏ច្រើនសន្ធឹកសន្ធាប់បែបនេះ ត្រូវបានមើលឃើញថាជាការខ្វះចន្លោះយ៉ាងធ្ងន់ធ្ងរក្នុងការគ្រប់គ្រងរបស់ប្រធានសាខាគយប្រចាំខេត្តទាំងពីរ។
អង្គភាពគេហទំព័រ”ប្រម៉ាញ់ជាយដែនធីវី” យើងខ្ញុំ ផ្សព្វផ្សាយព័ត៌មាននេះ ក្នុងន័យរិះគន់ដើម្បីស្ថាបនា និងឆ្លុះបញ្ចាំងតថភាពពិតជូនមហាជន ក៏ដូចជាថ្នាក់ដឹកនាំជាន់ខ្ពស់បានជ្រាបជាព័ត៌មាន ដើម្បីពង្រឹងប្រសិទ្ធភាពការងារ និងតម្លាភាព។ អង្គភាពយើងខ្ញុំ រង់ចាំការឆ្លើយបំភ្លឺពីគ្រប់ស្ថាប័នពាក់ព័ន្ធរៀងរាល់ម៉ោងធ្វើការ ស្របតាមច្បាប់ស្តីពីរបបសារព័ត៌មាន។ សូមអរគុណ!
