ខេត្តត្បូងឃ្មុំ÷សេចក្តីរាយការណ៍ និងការលាតត្រដាងការពិតពីសំណាក់អ្នកសារព័ត៌មាន បានបង្ហាញយ៉ាងច្បាស់អំពីភាពអសកម្ម និងការបណ្តែតបណ្តោយរបស់អាជ្ញាធរមានសមត្ថកិច្ចស្រុកមេមត់ ក្នុងការអនុវត្តគោលនយោបាយ «ភូមិ-ឃុំ-សង្កាត់មានសុវត្ថិភាព» របស់ក្រសួងមហាផ្ទៃ។ សកម្មភាពល្មើសច្បាប់ និងអំពើហិង្សាដែលបានកើតឡើងបង្ហាញពីការគំរាមកំហែងយ៉ាងធ្ងន់ធ្ងរដល់សន្តិសុខសង្គម និងសិទ្ធិសេរីភាពនៃការបញ្ចេញមតិ។១.ប្រតិការណ៍នៃការរំលោភបំពាន និងប្រើអំពើហិង្សាលើអ្នកសារព័ត៌មាននៅថ្ងៃទី០២ ខែឧសភា ឆ្នាំ២០២៦ លោក អ៊ុន គីមម៉េង ចាងហ្វាងគេហទំព័ររស្មីកោះធំ បានចុះទៅយកព័ត៌មាន និងបានរាយការណ៍អំពីទីតាំងល្បែងស៊ីសងមួយកន្លែង ដែលកំពុងដំណើរការយ៉ាងរលូនក្នុងចំការកៅស៊ូ ស្ថិតក្នុងឃុំមេមត់ ស្រុកមេមត់ ខេត្តត្បូងឃ្មុំ។ មុនពេលដែលកម្លាំងសមត្ថកិច្ចចុះមកដល់ទីតាំងកើតហេតុ ស្រាប់តែលេចមុខក្រុមអ្នកកាងល្បែង (ប្រុស-ស្រី ៦ទៅ៧នាក់) បានប្រើប្រាស់អំពើហិង្សា និងវាយដំលើលោក អ៊ុន គីមម៉េង យ៉ាងដំណំ បណ្តាលឱ្យរងរបួស។
បច្ចុប្បន្ន ជនរងគ្រោះបានដាក់ពាក្យបណ្តឹងរួចរាល់ហើយទៅកាន់ស្នងការដ្ឋាននគរបាលខេត្តត្បូងឃ្មុំ ដើម្បីស្វែងរកយុត្តិធម៌។២.ការរិះគន់ស៊ីជម្រៅទៅលើការទទួលខុសត្រូវ របស់អាជ្ញាធរ ភាពអសកម្មនៃការបណ្ដែតបណ្ដោយ ការដែលទីតាំងល្បែងស៊ីសងអាចបើកដំណើរការបានយ៉ាងគគ្រឹកគគ្រេង ក្នុងពេលដែលរាជរដ្ឋាភិបាលបានដាក់បទបញ្ជាយ៉ាងតឹងរ៉ឹង គឺជាការបង្ហាញឱ្យឃើញពីការខ្វះការទទួលខុសត្រូវ ឬអាចមានការពាក់ព័ន្ធផលប្រយោជន៍ណាមួយរបស់មន្ត្រីមូលដ្ឋាន។
ការឆ្លើយតបរបស់មន្ត្រីនគរបាល ដូចជាលោក យ៉េន ស៊ីថា អធិការរងទទួលបន្ទុកព្រហ្មទណ្ឌ ដែលបានបញ្ជាក់ថា «មិនបានដឹងរឿង» គឺជាការឆ្លុះបញ្ចាំងពីភាពទន់ខ្សោយ និងកង្វះកិច្ចសហការក្នុងការថែរក្សាសន្តិសុខជូនប្រជាពលរដ្ឋ។
ឥទ្ធិពលរបស់មេខ្លោង÷ វត្តមានរបស់បុគ្គលឈ្មោះ «តាលឹម» ដែលត្រូវបានប្រជាពលរដ្ឋស្គាល់ថាជាមេក្លោងល្បែងស៊ីសងដ៏មានឥទ្ធិពលក្នុងស្រុកមេមត់ និងស្រុកពញាក្រែក បានក្លាយជាសំណួរធំមួយចោទសួរថា៖ “តើហេតុអ្វីបានជាសមត្ថកិច្ចមិនអាចបង្ក្រាបបុគ្គលរូបនេះបាន ឬមួយក៏មានខ្សែបណ្ដាញនៅពីក្រោយខ្នង”។
៣.ការទាមទាររកយុត្តិធម៌និងការអនុវត្តច្បាប់.ប្រជាពលរដ្ឋក្នុងមូលដ្ឋានបានលើកឡើងថា ល្បែងស៊ីសងកំពុងតែបំផ្លាញជីវភាពរស់នៅ និងបង្កអសន្តិសុខក្នុងសហគមន៍។ ដូច្នេះ ដើម្បីស្តារទំនុកចិត្តពីប្រជាពលរដ្ឋឡើងវិញ ស្ថាប័នមានសមត្ថកិច្ចពាក់ព័ន្ធគួរតែ៖ចាត់ប្រធានការផ្លូវច្បាប់ជាបន្ទាន់ ត្រូវស្រាវជ្រាវ និងចាប់ខ្លួនក្រុមជនល្មើសដែលបានប្រើអំពើហិង្សាលើអ្នកសារព័ត៌មាន មកផ្តន្ទាទោសតាមច្បាប់។
បិទទីតាំងល្បែងស៊ីសង÷ អនុវត្តបទបញ្ជារបស់រាជរដ្ឋាភិបាលយ៉ាងម៉ឺងម៉ាត់ ដោយគ្មានការលើកលែង។
ស៊ើបអង្កេតមន្ត្រីពាក់ព័ន្ត÷ ពិនិត្យមើលការអនុវត្តតួនាទីរបស់អធិការនគរបាលស្រុកមេមត់ និងមន្ត្រីក្រោមឱវាទ ដែលបណ្តែតបណ្តោយឱ្យមានបទល្មើសកើតឡើងក្នុងមូលដ្ឋានរបស់ខ្លួន។
កំណត់សម្គាល់÷អង្គភាពសារព័ត៌មានយើងខ្ញុំផ្សព្វផ្សាយព័ត៌មាននេះគ្រាន់តែចង់ជម្រាបជូនមហាជននិងថ្នាក់ដឹក នាំជ្រាបជាព័ត៌មាន ក្នុងព្រឹត្តិការណ៍អ្វីដែលកើតមាននៅក្នុងមូលដ្ឋានតែប៉ុណ្ណោះ។ អង្គភាពគេហទំព័រ ប្រម៉៉ាញ់ជាយដែន ធី វីយើង គ្រាន់តែជាកញ្ចក់ឆ្លុះបញ្ចាំង រិះគន់ក្នុងន័យស្ថាបនា ហើយសូមរង់ចាំការឆ្លើយបំភ្លឺពីគ្រប់ស្ថាប័នពាក់ព័ន្ធ គ្រប់ពេលម៉ោងធ្វើការតាមរបបអ្នកសារព័ត៌មាន។ សូមអរគុណ!
