ខេត្តបាត់ដំបង÷ ព្រឹកថ្ងៃទី២៩ ខែមេសា ឆ្នាំ២០២៦ នេះ ឯកឧត្តម ផេង សិទ្ធី អភិបាលរង នៃគណៈអភិបាលខេត្តបាត់ដំបង តំណាងដ៏ខ្ពង់ខ្ពស់ឯកឧត្តមសុខ លូ អភិបាលខេត្ត បានអញ្ជើញជាអធិបតីក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុ (ប័ណ្ណកម្មសិទ្ធិដីធ្លី) ជូនដល់ប្រជាពលរដ្ឋរស់នៅក្នុងភូមិអូរមុនី១ ឃុំអន្លង់វិល ស្រុកសង្កែ។
ក្នុងពិធីដ៏មានអត្ថន័យនេះ ក៏មានការអញ្ជើញអមដំណើរដោយ លោកវរសេនីយ៍ឯក ប៉ោ វិចិត្រ មេបញ្ជាការរង កងរាជអាវុធហត្ថខេត្តបាត់ដំបង ព្រមទាំងមានការចូលរួមពីមន្ត្រីជំនាញនៃមន្ទីរពាក់ព័ន្ធ អាជ្ញាធរមូលដ្ឋាន និងបងប្អូនប្រជាពលរដ្ឋយ៉ាងច្រើនកុះករ ដែលពិធីនេះត្រូវបានរៀបចំឡើងនៅបរិវេណផ្សារត្នោតជូរ ភូមិជំនីក ឃុំអន្លង់វិល ស្រុកសង្កែ ខេត្តបាត់ដំបង។ ការផ្ដល់សិទ្ធិស្របច្បាប់÷ ការចែកវិញ្ញាបនបត្រសម្គាល់ម្ចាស់អចលនវត្ថុនាពេលនេះ គឺជាការឆ្លុះបញ្ចាំងពីការយកចិត្តទុកដាក់ខ្ពស់របស់រាជរដ្ឋាភិបាល ក៏ដូចជារដ្ឋបាលខេត្ត ក្នុងការបង្ខិតសេវាសាធារណៈឱ្យកៀកនឹងពលរដ្ឋ ដើម្បីធានាបាននូវសិទ្ធិលើកម្ចាស់ដីធ្លីស្របច្បាប់ និងបង្កើនភាពជឿជាក់លើការគ្រប់គ្រងអចលនវត្ថុ។
កាត់បន្ថយទំនាស់ដីធ្លី÷ ប័ណ្ណកម្មសិទ្ធិនេះមិនត្រឹមតែជាឯកសារបញ្ជាក់ពីសិទ្ធិកាន់កាប់ប៉ុណ្ណោះទេ ប៉ុន្តែវាជាឧបករណ៍ដ៏សំខាន់ក្នុងការបង្ការ និងកាត់បន្ថយទំនាស់ដីធ្លីក្នុងសហគមន៍ ព្រមទាំងជួយសម្រួលដល់ការប្រើប្រាស់ដីធ្លីជាដើមទុនសម្រាប់អភិវឌ្ឍន៍សេដ្ឋកិច្ចគ្រួសារ។ វត្តមានរបស់លោកវរសេនីយ៍ឯក ប៉ោ វិចិត្រ និងកម្លាំងកងរាជអាវុធហត្ថ ក្នុងកម្មវិធីនេះ បានបង្ហាញពីកិច្ចសហការយ៉ាងជិតស្និទ្ធរវាងកម្លាំងសមត្ថកិច្ច និងអាជ្ញាធរស៊ីវិល ក្នុងការរក្សាសន្តិសុខ សណ្ដាប់ធ្នាប់ និងជួយសម្របសម្រួលឱ្យដំណើរការចែកប័ណ្ណជូនពលរដ្ឋប្រព្រឹត្តទៅដោយរលូន និងមានសុវត្ថិភាព។ ក្នុងឱកាសនោះ ឯកឧត្តមអភិបាលរងខេត្ត ក៏បានផ្ដាំផ្ញើដល់បងប្អូនប្រជាពលរដ្ឋដែលទទួលបានប័ណ្ណកម្មសិទ្ធិនៅថ្ងៃនេះ សូមមេត្តាថែរក្សាឯកសារដ៏មានតម្លៃនេះឱ្យបានល្អប្រសើរ និងប្រើប្រាស់វាឱ្យចំគោលដៅ ដើម្បីកសាងអនាគតគ្រួសារឱ្យកាន់តែរឹងមាំ។ គួរបញ្ជាក់ផងដែរថា យុទ្ធនាការផ្តល់ប័ណ្ណកម្មសិទ្ធិដីធ្លីនេះ គឺជាផ្នែកមួយនៃគោលនយោបាយយុទ្ធសាស្ត្ររបស់រដ្ឋបាលខេត្តបាត់ដំបង ដើម្បីជំរុញការចុះបញ្ជីដីធ្លីបង្ហើយជូនប្រជាពលរដ្ឋទូទាំងខេត្ត ឱ្យបានឆាប់រហ័ស តម្លាភាព និងមានប្រសិទ្ធភាពខ្ពស់បំផុត៕ អត្ថបទ÷ដោយ លោក មុត ចិត្រា ប្រម៉ាញ់ជាយដែន
