ខេត្តបាត់ដំបង÷ ហេតុការណ៍គ្រោះអគ្គិភ័យគួរឱ្យភ្ញាក់ផ្អើលមួយ បានកើតឡើងកាលពីវេលាម៉ោង ១:៣០ នាទីរសៀល ថ្ងៃទី២២ ខែមីនា ឆ្នាំ២០២៦ ស្ថិតនៅចំណុចក្រុមទី២១ ភូមិអញ្ចាញ សង្កាត់អូរចារ ក្រុងបាត់ដំបង ខេត្តបាត់ដំបង បណ្តាលឱ្យឆេះបំផ្លាញរោងសិប្បកម្មកែច្នៃឈើមួយខ្នងអស់ទាំងស្រុង។
យោងតាមប្រភពព័ត៌មានពីសមត្ថកិច្ចបានឱ្យដឹងថា រោងសិប្បកម្មដែលរងការខូចខាតមានទំហំ 5m \times 7m សង់អំពីឈើ ដំបូលស័ង្កសី (ប្រភេទសង់ផ្ទាល់ដី) ជាកម្មសិទ្ធិរបស់លោកស្រី គីមឡាង អាយុ ៧២ ឆ្នាំ (មានទីលំនៅភូមិ ២០ ឧសភា សង្កាត់ស្វាយប៉ោ)។ លោកស្រីបានជួលដី និងរោងនេះឱ្យទៅបុរសម្នាក់ឈ្មោះ ឌុងដើម្បីដំណើរការអាជីវកម្មកែច្នៃឈើ។
គ្រោះអគ្គិភ័យនេះបានលេបត្របាក់ទាំងស្រុងនូវ៖
រោងសិប្បកម្មចំនួន ០១ ខ្នង។
សម្ភារជាង និងឧបករណ៍ប្រើប្រាស់សម្រាប់កែច្នៃឈើមួយចំនួនធំ។
សរុបតម្លៃការខូចខាត÷ ត្រូវបានប៉ាន់ស្មានថាមានចំនួនប្រហែល ៣០០០ដុល្លារ( បីពាន់ដុល្លារអាមេរិក)
ភ្លាមៗក្រោយទទួលព័ត៌មាន កម្លាំងការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលខេត្តបាត់ដំបង បានបញ្ជូនរថយន្តពន្លត់អគ្គិភ័យចំនួន ០៣គ្រឿង ចេញទៅអន្តរាគមន៍។ ក្នុងប្រតិបត្តិការនេះ សមត្ថកិច្ចបានប្រើប្រាស់ទឹកអស់ចំនួន ០២រថយន្តដោយមានការចូលរួមយ៉ាងសស្រាក់សស្រាំពីសំណាក់អាជ្ញាធរមូលដ្ឋាន និងប្រជាពលរដ្ឋក្នុងតំបន់។ ជាលទ្ធផល គ្រាប់ភ្លើងត្រូវបានគ្រប់គ្រង និងរលត់ទៅវិញជាស្ថាពរ ដោយមិនបង្កឱ្យមានការឆ្លងរាលដាលដល់ផ្ទះប្រជាពលរដ្ឋដែលរស់នៅក្បែរខាងនោះឡើយ។
បច្ចុប្បន្ន មន្ត្រីជំនាញកំពុងបន្តធ្វើការស្រាវជ្រាវយ៉ាងយកចិត្តទុកដាក់ ដើម្បីស្វែងរកមូលហេតុពិតប្រាកដដែលបង្កឱ្យមានគ្រោះអគ្គិភ័យនេះឡើង៕ ដោយ សឿនហៀរ ឡុង
