ខេត្តកំពង់ស្ពឺ ៖ ក្រោមបទបញ្ជាផ្ទាល់ពី លោកឧត្តមសេនីយ៍ទោ ឃឹម សុក ខៃ ស្នងការនគរបាលខេត្តកំពង់ស្ពឺ កម្លាំងជំនាញប្រឆាំងគ្រឿងញៀនបានបើកប្រតិបត្តិការទ្រង់ទ្រាយធំក្នុងរយៈពេល ៧២ម៉ោង (គិតត្រឹមថ្ងៃទី១៣ ខែមីនា ឆ្នាំ២០២៦) ដោយឈានទៅបង្ក្រាប និងឃាត់ខ្លួនក្រុមបក្ខពួកជួញដូរគ្រឿងញៀនយ៉ាងសកម្ម ដែលសម្ងំធ្វើសកម្មភាពក្នុងភូមិសាស្ត្រស្រុកគងពិសី និងស្រុកសំរោងទង។
កម្លាំងសមត្ថកិច្ចដឹកនាំដោយ លោកវរសេនីយ៍ទោ ហ៊ាង ឈាង លី ស្នងការរង និងមានការសម្របសម្រួលពី ឯកឧត្តម សុិន វិរៈ ព្រះរាជអាជ្ញាអមសាលាដំបូងខេត្ត បានសម្រេចលទ្ធផលដូចខាងក្រោម៖
ឃាត់ខ្លួនជនសង្ស័យបាន÷ ចំនួន ៧នាក់ (ស្រី ២នាក់) ដែលជាបក្ខពួក និងអ្នកចែកចាយបន្ត។
វត្ថុតាងដែលសមត្ថកិច្ចចាប់ដកហូបបានរួមមាន÷
ម្សៅក្រាមពណ៌សថ្លា (សង្ស័យជាគ្រឿងញៀន) ចំនួន ១៥ កញចប់ ដែលមានទម្ងន់សរុបរហូតដល់ ១.៦៩៧.២៧ ក្រា ម(ជិត ២គីឡូក្រាម)។
សារធាតុមិនច្បាស់ ១កញ្ចប់ និងឧបករណ៍ពាក់ព័ន្ធមួយចំនួន (ទូរស័ព្ទ ៩គ្រឿង, ម៉ូតូ ២គ្រឿង, ជញ្ជីងថ្លឹង និងសម្ភារៈប្រើប្រាស់មួយចំនួនទៀត)។
ជនសង្ស័យទាំង ៧នាក់ រួមមានឈ្មោះ ខឹម សុផា, រឿន គឹមសាន្ត, ស៊ិប ដន, យឿន យ៉េង, ឌឹម ឡាញ់, នួន សុខុន និង សា រ៉ាថាន់។ ដោយឡែក មុខសញ្ញាម្នាក់ទៀតឈ្មោះ ខពស បានរត់គេចខ្លួនបាត់ ដែលពេលនេះសមត្ថកិច្ចកំពុងតាមប្រមាញ់យ៉ាងក្តៅគគុក។
បច្ចុប្បន្ន ជនសង្ស័យ និងវត្ថុតាងទាំងអស់ ត្រូវបានបញ្ជូនទៅកាន់ស្នងការដ្ឋាននគរបាលខេត្តកំពង់ស្ពឺ ដើម្បីកសាងសំណុំរឿងបញ្ជូនទៅកាន់សាលាដំបូងខេត្ត ចាត់ការតាមនីតិវិធីច្បាប់។
នេះគឺជាជោគជ័យថ្មីមួយទៀត របស់ស្នងការដ្ឋាននគរបាលខេត្តកំពង់ស្ពឺ
ក្នុងការកំចាត់មេរោគសង្គម ដើម្បីផ្ដល់ភាពកក់ក្តៅ និងសុវត្ថិភាពជូនប្រជាពលរដ្ឋនៅក្នុងមូលដ្ឋាន។
ដោយ មុត ចិត្រា ប្រម៉ាញ់ជាយដែន
