[ខេត្តបាត់ដំបង]៖ កម្លាំងនគរបាល និងកងរាជអាវុធហត្ថស្រុកកំរៀង បានបើកប្រតិបត្តិការបង្ក្រាប និងស្ទាក់ឃាត់រថយន្តមួយគ្រឿងដែលដឹកសាកសពបុរសម្នាក់ ពាក់ព័ន្ធនឹងករណីឃាតកម្មបាញ់សម្លាប់យ៉ាងសាហាវ ចេញពីទឹកដីខេត្តប៉ៃលិន។
១. ព័ត៌មាននៃកិច្ចប្រតិបត្តិការ
ប្រតិបត្តិការនេះបានធ្វើឡើងនៅវេលាម៉ោង ០១:៣០ នាទីរំលងអាធ្រាត្រ ឈានចូលថ្ងៃទី០៨ ខែកុម្ភៈ ឆ្នាំ២០២៦ នៅចំណុចភូមិអូរដា ឃុំអូរដា ស្រុកកំរៀង ខេត្តបាត់ដំបង។ សមត្ថកិច្ចបានឃាត់ទុក៖
រថយន្ត៖ ម៉ាក Starex ពណ៌ស ស្លាកលេខ ភ្នំពេញ 2AV-3067។
អ្នកបើកបរ៖ ឈ្មោះ វិញ លឿត ភេទប្រុស អាយុ ៣៤ឆ្នាំ (មកពីខេត្តបន្ទាយមានជ័យ)។
សាកសពជនរងគ្រោះ៖ ឈ្មោះ ប៉ែន សុវណ្ណ ភេទប្រុស អាយុ ៤៣ឆ្នាំ (ស្លាប់ដោយសាររងការបាញ់សម្លាប់)។
២. ការបំភ្លឺពីអ្នកបើកបរ
តាមចម្លើយសារភាពបឋមរបស់ឈ្មោះ វិញ លឿត បានឱ្យដឹងថា កាលពីពាក់កណ្តាលអធ្រាត្រថ្ងៃទី០៧ ខែកុម្ភៈ ខ្លួនបានដឹកជនជាតិចិន ០៦នាក់ ចេញពីផ្សារព្រំ ឆ្ពោះទៅក្រុងប៉ោយប៉ែត។ ក្នុងអំឡុងពេលធ្វើដំណើរ ក្រុមជនជាតិចិនទាំងនោះបានឈ្លោះប្រកែកគ្នា ហើយម្នាក់ក្នុងចំណោមនោះបានដកកាំភ្លើងផ្ជង់បង្ខំឱ្យខ្លួនឈប់រថយន្ត។
ដោយការភ័យខ្លាច ខ្លួនបានលោតចុះពីលើរថយន្តរត់ចូលព្រៃ។ ភ្លាមៗនោះ មានរថយន្តមួយគ្រឿងទៀតមកទទួលក្រុមជនជាតិចិន ០៥នាក់នោះចេញទៅបាត់ ដោយបន្សល់ទុកសាកសពបុរសម្នាក់នៅក្នុងរថយន្តរបស់ខ្លួន។ ក្រោយមក ខ្លួនក៏ត្រឡប់មកបើករថយន្តបន្ត រហូតដល់សមត្ថកិច្ចស្ទាក់ឃាត់បានតែម្តង។
៣. ចំណាត់ការបន្ត
បច្ចុប្បន្ន ទាំងអ្នកបើកបរ និងសាកសពជនរងគ្រោះ ត្រូវបានឃាត់ទុកបណ្តោះអាសន្ននៅអធិការដ្ឋាននគរបាលស្រុកកំរៀង ដើម្បីធ្វើកោសល្យវិច័យ និងសាកសួរបន្ថែម។ សមត្ថកិច្ចកំពុងបន្តនីតិវិធីផ្ទេររឿងក្តីនេះទៅឱ្យសមត្ថកិច្ចខេត្តប៉ៃលិន ដើម្បីវែកមុខស្វែងរកក្រុមឃាតកពិតមកផ្តន្ទាទោសតាមច្បាប់។
ករណីនេះកំពុងស្ថិតក្រោមការស៊ើបអង្កេតយ៉ាងយកចិត្តទុកដាក់ពីកម្លាំងសមត្ថកិច្ចចម្រុះ។ ដោយ ប្រម៉ាញ់ជាយ ដែន០១
