បន្ទាយមានជ័យ៖ អនុវត្តតាមការចង្អុលណែនាំរបស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ, នៅរសៀលថ្ងៃទី០៧ ខែកុម្ភៈ ឆ្នាំ២០២៦ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានដឹកនាំប្រតិភូអមដំណើរ អញ្ជើញដាក់កម្រងផ្កា និងគោរពវិញ្ញាណក្ខន្ធសព លោកវរសេនីយ៍ទោ យី សុថាត់ នាយរងផ្នែកនគរបាលប្រឆាំងគ្រឿងញៀន នៃអធិការដ្ឋាននគរបាលស្រុកថ្មពួក ដែលបានពលីជីវិតក្នុងបុព្វហេតុជាតិ។
សេចក្តីសង្ខេបនៃវីរភាព និងការលះបង់៖
មូលហេតុនៃការលះបង់៖ លោកវរសេនីយ៍ទោ យី សុថាត់ បានរងរបួសធ្ងន់ដោយអំបែងគ្រាប់ចំក្បាល ក្នុងសមរភូមិប្រយុទ្ធការពារបូរណភាពទឹកដី កាលពីថ្ងៃទី១០ ខែធ្នូ ឆ្នាំ២០២៥។
ការទទួលមរណភាព៖ ក្រោយការខិតខំសង្គ្រោះយ៉ាងយកចិត្តទុកដាក់ពីក្រុមគ្រូពេទ្យនៅមន្ទីរពេទ្យមិត្តភាពកម្ពុជា-ចិន ព្រះកុសុមៈ លោកបានទទួលមរណភាព (ពលី) នៅថ្ងៃទី០៦ ខែកុម្ភៈ ឆ្នាំ២០២៦ វេលាម៉ោង ១២:៤៥នាទី។
ទីកន្លែងតម្កល់សព៖ ក្រុមគ្រួសារបានរៀបចំពិធីបុណ្យតាមប្រពៃណី នៅភូមិបន្ទាយឆ្មារជើង ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។
ការប្រសិទ្ធនាមជាវីរនគរបាល៖
ក្នុងឱកាសដ៏ក្រៀមក្រំនោះ លោកឧត្តមសេនីយ៍ទោ សិទ្ធិ ឡោះ បានសម្តែងនូវការចូលរួមរំលែកទុក្ខយ៉ាងជ្រាលជ្រៅជាមួយក្រុមគ្រួសារសព និងបានលើកសរសើរថា៖
”ការបាត់បង់លោកវរសេនីយ៍ទោ យី សុថាត់ គឺជាការបាត់បង់នូវវីរនគរបាលដ៏អង់អាចក្លាហាន ដែលបានលះបង់សាច់ស្រស់ឈាមស្រស់ ដើម្បីបុព្វហេតុការពារជាតិ មាតុភូមិ និងប្រជាជន។ វីរភាពរបស់លោកនឹងដក់ជាប់ក្នុងដួងចិត្តរបស់ប្រជាជនកម្ពុជាជានិច្ច”។
ជាកិច្ចចុងក្រោយ លោកស្នងការក៏បាននាំយកថវិការបស់ ឯកឧត្តម នាយឧត្តមសេនីយ៍ ស ថេត ចំនួន ២,០០០,០០០ រៀល ប្រគល់ជូនគ្រួសារសព ដើម្បីចូលរួមចាត់ចែងក្នុងកម្មវិធីបុណ្យផងដែរ។ ដោយ ចិត្រា ប្រម៉ាញ់ជាយដែន
