ខេត្តកំពង់ធំ៖ នៅរសៀលថ្ងៃទី១៣ ខែវិច្ឆិកា ឆ្នាំ២០២៥ ឧត្តមសេនីយ៍ទោ សោម ស៊ុន មេបញ្ជាការ តំបន់ប្រតិបត្តិការសឹករងកំពង់ធំ អនុប្រធានអចិន្ត្រៃយ៍ នៃគណៈកម្មការ គ្រប់គ្រង ការពារ ទប់ស្កាត់ និងបង្ក្រាបបទល្មើសធនធានធម្មជាតិ ខេត្តកំពង់ធំ បានទៅសំណេះសំណាលសាកសួរសុខទុក្ខកងកម្លាំងចម្រុះ ដែលកំពុងប្រចាំការនៅទីបញ្ជាការស្រាលតំបន់អូរសោម នឹងបានត្រួតពិនិត្យលទ្ធផលនៃការ ការពារ ទប់ស្កាត់ បង្ក្រាបបទល្មើសធនធានធម្មជាតិ នាពេលកន្លងទៅ នៅក្នុងដែនជម្រកសត្វព្រៃ ព្រៃឡង់ ក្នុងភូមិសាស្ត្រ ស្រុកសណ្ដាន់ ខេត្តកំពង់ធំ ។
លោក លី ស្រេង ប្រធានការិយាល័យឧទ្យានុរក្ស នៃមន្ទីរបរិស្ថានខេត្តកំពង់ធំ និងជាប្រធានទីបញ្ជាការស្រាល ប្រចាំការនៅតំបន់អូរសោម បានរាយការណ៍អំពីសកម្មភាពគ្រប់គ្រងការពារទប់ស្កាត់ និងបង្ក្រាបបទល្មើសធនធានធម្មជាតិ ក្នុងដែនជម្រកសត្វព្រៃ ព្រៃឡង់ក្នុងរយៈពេលជាងមួយឆ្នាំកន្លងទៅ បានទទួលលទ្ធផលល្អគួរជាទីមោទនៈ ដោយកងកម្លំាងចម្រុះបានសាមគ្គីសហការគ្នាបំពេញភារកិច្ចទប់ស្កាត់បានជោគជ័យការកាប់ទន្ទ្រានដីព្រៃឈើរបស់រដ្ឋធ្វើជាកម្មសិទ្ធិ ហើយដីព្រៃឈើដែលបានលួចកាប់ទន្ទ្រានកន្លងទៅត្រូវបានដកហូតទុកជាសម្បត្តិរបស់រដ្ឋ ។
ឧត្តមសេនីយ៍ទោ សោម ស៊ុន បានថ្លៃងអំណរគុណចំពោះកងកម្លាំងចម្រុះ ដែលបានខិតខំប្រឹងប្រែងបំពេញភារកិច្ចក្នុងរយៈពេលជាងមួយឆ្នាំកន្លងទៅនេះ ទទួលបានលទ្ធផលល្អប្រសើរគួរជាទីមោទនៈ ។ ដោយបច្ចុប្បន្នមិនមានជនល្មើសណាមួយ លបលួចកាប់ទន្ទ្រានដីព្រៃរបស់រដ្ឋ យកធ្វើជាកម្មសិទ្ធិនៅក្នុងតំបន់ព្រៃឡង់ទៀតបានឡើយ ។ ហើយដីព្រៃដែលបានលួចកាប់ទន្ទ្រានកន្លងទៅ ត្រូវបានកងកម្លាំងចម្រុះគ្រប់គ្រង ជាសម្បត្តិរបស់រដ្ឋ ហើយត្រូវបានដុះលូតលាស់ដោយព្រៃធម្មជាតិឡើងវិញផងដែរ ។ ដោយឡែកការលួចកាប់ និងដឹកជញ្ជូនផលអនុផលព្រៃឈើ នៅក្នុងព្រៃសហគមន៍មួយចំនួន នៅមានសេសសល់បន្តិចបន្តួចនៅឡើយ ដែលចាំបាច់យើងត្រូវបន្តទប់ស្កាត់ និងបង្ក្រាបឲ្យបានជាដាច់ខាត ។
ឧត្តមសេនីយ៍ទោ សោម ស៊ុន បានប្រគល់ភារកិច្ច ជូនដល់កងកម្លាំងចម្រុះទាំងអស់ ត្រូវបន្តសកម្មភាពឲ្យដូចភ្លៀងរលឹម ក្នុងការការពារ ទប់ស្កាត់ និងបង្ក្រាបបទល្មើសធនធានធម្មជាតិ តាមបទបញ្ជារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ ព្រមទាំងឯកឧត្តមអភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ ឲ្យទទួលបានជោគជ័យ ដើម្បីបុព្វហេតុប្រជាជន និងសង្គមជាតិយើងទាំងមូល ។
នៅក្នុងឱកាសនេះដែរ ឧត្តមសេនីយ៍ទោ សោម ស៊ុន បានប្រគល់ស្បៀងអាហារ គ្រឿងឧបភោគបរិភោគ ប្រេងឥន្ធនៈ ដែលជាអំណោយរបស់សម្តេចមហាបវរធិបតីហ៊ុន ម៉ាណែត និងលោកជំទាវ តាមរយៈឯកឧត្តមវង្សី វិស្សុត ឧបនាយករដ្ឋមន្ត្រី ប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ ជូនដល់កងកម្លាំងចម្រុះ នៅទីបញ្ជាការស្រាលតំបន់អូសោម ដើម្បីបន្តសកម្មភាពបង្ក្រាបបទល្មើសធនធានធម្មជាតិ ឲ្យដូចភ្លៀងរលឹមដោយគ្មានការដកថយឡើយ ។
